Саха сиригэр социальнай гаастааһын бырагыраамата салҕанар

Гаас тэрилтэтин офиһыгар киһи кэлиитэ көхтөөх. Ким гаас төлөбүрүгэр, ким холбонуу боппуруоһунан уочараттыыр. Киин куорат олохтооҕо Павел Николаев саҥа дьиэтигэр гаас киллэттэрээри сайаапка түһэрэ кэлбит. Докумуоннарбын туттаран дуогабар түһэрсэрим хаалла диэн этэр.

Павел Николаев, Дьокуускай олохтооҕо: «Сонуннарга истибитим. Бүппүтэ буолуо дии санаабытым, кэлбитим баар эбит».

Дьокуускайы ылар эбит буоллахха, быйыл 791 ыал гааска холбонуохтаах, онтон билигин номнуо сүүсчэкэ кэриҥэ ыал социальнай гаастааһын бырагырааматынан туһаммыт.

Валерий Слепцов, "Сахатранснефтегаз" тэрилтэҕэ техническэй холбооһун салаатын салайааччытын солбуйааччы: «Кыһын, саас тутуу бара турбута. Ол биһин билиҥҥи кэмҥэ 500-чэ газ ситимин киириитэ тахсан турар, онтон 300 дьиэҕэ гааһа киирэн турар».

Бэлиэтээн эттэххэ, Социальнай гааһынан хааччыйыы бырагыраамата дойду үрдүнэн 2021 сыллаахтан олохххо киирбитэ. Ол кэмтэн ыла өрөспүүбүлүкэ үрдүнэн тыһыынчанан ыал дьиэтин гааска холбуур кыахтанна.

Быйыл Дьокуускайы сэргэ Чурапчы, Горнай, Мэҥэ Хаҥалас улуустарыгар үлэ ыытыллар. Мэҥэ-Хаҥалас улууһун Сыымах нэһилиэгэр аны күһүн гаас киириэхтээх. Маныаха Сыымах-Лоомтука икки ардыларынааҕы гаас турбата былырыын тутуллубута.

Дмитрий Акимов, Мэҥэ Хаҥалас улууһун Сыымах нэһилиэгин баһылыга: «Бүгүҥҥү күҥҥэ Сыымах уонна Бэдьимэ нэһилиэктэр икки ардынааҥҥы ситим дьааматын хаһыы үлэтэ бара турар».

Социальнай гаастааһын бырагырааматыгар болоҕор биирдэ эрэ, ким баҕарар хапсар кыахтаах. Маныаха гаас тиэргэн кыраныыссатыгар диэри кэлэр. Онтон дьиэ иһигэр диэри тартарыыга, нэһилиэнньэ кэккэ араҥата бэтэрээннэр, инбэлиитэр, кыра дохуоттаахтар, элбэх оҕолоохтор, анал байыанай дьайыы кыттыылаахтара субсидиянан туһанар кыахтаахтар. Көмө үбү гаас турбатын дьиэҕэ киллэриигэ, хочуол, билиитэ, радиатор, турбалары ылынныыга, гааһы холботорго туттуохха сөп.

Николай Попов, социальнай политика департаменын салайааччытын солбуйаачы: «Үлэтэ киирэр, бэдэрээччиттэр төһө оҥорбуттара. Ону таһынан 150 тыһ. саҕалаан 202 тыһ. дылы киирэр. 11 улуус сайаапка биэрдэ. Билиҥҥи туругунан 220 ыал көмөнү ылла».

Көмөнү ылыыга сайабылыанньаны улуус дьаһалтатыгар, куорат уокуругар олорор сиринэн бэриллэр.