Өрөспүүбүлүкэҕэ ойуур баһаара тахсар кутталлаах кэмэ салҕанар

Бу күннэргэ 5 кылаастаах ойуур баһаара тахсар кутталлаах кэм Өймөкөөн улууһугар бэлиэтэннэ. Оттон билигин киин улуустарга 4 кылаастаах ойуур баһаара тахсар куттала баар. Бу нэдиэлэҕэ уһун өрөбүллэр күүтэллэр, онон айылҕаҕа тахсааччылар ордук сэрэхтээх буолаллара ирдэнэр. Маныаха киин куорат эргин көҥүллэнэр эрэ сирдэргэ сынньанын диэн ыксаллаах быһыы-майгы министиэристибэтэ иһитиннэрэр.

Ким Кузьмин, ЫБММ Саха сиринээҕи салалтатын Дьокуускай куораттааҕы баһаары утары кэтиир-хонтуруоллуур салаатын инспиэктэрэ: «Кангалааска чоҕу тиэйэр сир кэннинэн, Кангалаас тумуһугар уонна Владимировка сэлиэнньэтигэр. Ити ыйыллар миэстлэргэ ханнык баҕар кэмҥэ көҥүллэнэр. Ол эрэн аһаҕас уоту оттор сатаммат. Дьокуускайга оту уоттуур бобуллар».

Онон хас биирдии киһи баһаарынай ирдэбили тутуһан сылдьара итиэннэ айылҕаҕа харыстабыллаах сыһыана ирдэнэр. Ыам ыйыттан саҕалаан өрөспүүбүлүкэ үрдүнэн ойуур баһаара тахсар ордук кутталлаах кэмэ биллэриллэн турар. Бу кэм саҕаланыаҕыттан номнуо 129 ойуур баһаара тахса сылдьыбыта. Билигин икки улууска уопсайа 7 гаа иэннээх сиргэ уот турар. Төһө да билигин инники сыллары кытта тэҥнээтэххэ бу кэмҥэ баһаар ахсаана лаппа аҕыйаҕын үрдүнэн, өҥүрүк куйаас күннэр саҥа саҕаланан эрэллэр, онон улуустар үрдүк бэлэмнээх буолаллара ирдэнэр диэн суһал ыстаап мунньаҕар Ил Дархан сорудахтаата.  

Дмитрий Садовников, СӨ быпабыыталыстыба бэрэссэдээтэлин маҥнайгы солбуйааччы: «Кэккэ улуустарга үлэ мөлтөхтүк барарын бэлиэтээтэ. Ол курдук, нэһилиэнньэлээх пууннар сэрэхтээх буолалларыгар минбалаһа, мас кэрдиитин үлэтин ыытылла илигин бэлиэтээтэ уонна ыксыылларыгар, манна болҕомтону ууралларыгар ыҥырда. Маны тэҥэ, зондировщик сөмөлүөт күүстээхтик үлэлииригэр сорудах биэрдэ».

Күнү-дьылы кэтээн көрөр сулууспа иһитиннэрэринэн бу нэдиэлэҕэ куйаас күн-дьыл олохтоноро күүтүллэр. Салгын температуурата нуорматтан 3-5 кыраадыс үрдүүрэ сабаҕаланар. Ол эрэн өрөбүлтэн саҕалаан халлаан туруга биллэ уларыйыа, сөҥүү түһэрэ күүтүллэр, маныаха сорох сирдэринэн этиҥнээх ардахтаах күн-дьыл буолуоҕа. Онон кэтээн көрүү салҕанар, маны тэҥэ зондировщик сөмүлүөт үлэлииргэ бэлэм турар.