Эбэҥки норуота бүттүүнэ бакалдын бырааһынньыгын бэлиэтээтэ

Сэҥкэри буруотунан ааһан, чычыпкаан чуораанын чугдаардан Бакалдыҥҥа кэлбит дьон сиэри-туому хайаан да ааһар, алгыстанар. Сэҥкэри буруота ыраастыыр, онтон чычыпкаан чуораана саҥа дьылы бэлиэтиир.

Аал уоттарын таба этинэн күндүлүүллэр, ытыктыыр-сүгүрүйэр мастарын арыылаах илиилэлэринэн эмирийэн, үүммүт сылга туох баар үтүөнү көрдөһөллөр. Сиэри-туому Уус Майаттан төрүттээх, олоҥхоһут Валентин Исаков ыытта, биһиэхэ сиэри-туому саҕаланыаҕыттан бүтүөр диэри сиһилии кэпсээн,  алгыстаан, алҕаан түһүлгэҕэ ыытта.

Валентин Исаков, СӨ үтүөлээх артыыһа: «Эйиэхэ биһи олорорбут быһыытынан биһи эйигиттэн туох даҕаны куруутун көрдөһө, ааттаһа сылдьабыт».

Кэлбит ыалдьыт түһүлгэҕэ киириэн иннинэ табалары кытары "Мэнду" диэн дорооболоһон, имэрийэн ааһаллар.

Эдьигээн улууһуттан төрүттээх Раиса Ильинова киин куорат таһыгар община тэрийэн үлэлэппитэ хаһыс да сылыгар барда. Бу саас 6 тугутук күн сирин көрдө, онон өссө элбээтибит диэн үөрэ кэпсиир.

Раиса Ильинова, "Энэси халан" А.К. Ильинов аатынан община салайааччыта: «Лабыкта сииллэр, сайынын от сииллэр уонна комбикорм биэрэбин. Кыһыҥҥы өттүгэр дьон тахсаллар, сынньаналлар ол иһин киһиэхэ үөрүйэхтэр».

Ырыа-тойук, үҥкүү-битии. Хоту дойду хоһуун дьонун быстыспат сорҕото. Түргэн-түргэн, тэтимнээх хамсаныыннан уһук хоту айылҕатын, маанылаах кыылларын дьүһүйэллэр.

Ханна да хатыламмат кэрэ айылҕалаах дойдулара оһуорунан-мандарынан бэриллэн, төрүт  таҥас, киэргэл мааныта буолан, үйэлээх култуура быстыспат ситимэ.

Оксана Потапова, Дьааҥы улууһун олохтооҕо: «Бу гагара атаҕа диэн. Бу харысхал. Сайыҥҥы көрүҥэ».

Ханнык да бырааһынньык күн мааны сандалыта, төрүт аһа суох ыытыллыбат. Ыалдьытымсах эбэҥки норуота хас биирдии киһини айах тутан көрсөр, аһатан маанылыыр.

Матрёна Иванова, Уус Майа улууһун олохтооҕо, норуот маастара: «Баахыла, бэрэски. Эһэ этэ, кыыл суон очоҕоһо».

Оттон бу Ничипча Олло диэн эбэҥкилэр төрүт астара. Балыгы аһаҕас уокка үс чаас кэриҥэ тутан буһараллар. Амтана ураты, минньигэс буолар.

Бакалдын эбэҥки тылыттан тылбаастаатаххына көрсүһүү. Онон бу күн көрсүһэн сонуннарын үллэстэр, ахтылҕаннарын таһаарар күннэрэ. Хас да күн устата кэнсиэрдэр, ырыа-тойук, спортивнай күрэхтэһиилэр ыытылаллар.

Эбэҥкилэр аан дойду хас да сиринэн тэнийэн олорор, төрүт үгэһи тутуһан сылдьар норуоттартан биирдэстэрэ. Арассыыйаҕа 40-ча тыһыынча эбэҥки олорор, онтон Саха сиригэр 20 тыһыынчата баар. Үгүстэрэ уһук хоту, Арктика кытылыгар олохсуйан, ыстаадалырынан сылдьан көс олоҕу тутуһалар. Көлүөнэттэн-көлүөнэҕэ бэриллэр үтүө үгэһи өрө туталлар. Сылга биирдэ көрсүһэн, ахтылҕаннарын аһардар, сонуннарын үллэстэн өссө биир сылы туоруурга күүс-уох ылыннылар.