Дьокуускайга көҕөрдүү үлэтэ салҕанар

Куорат киинэ. Саха циркэ территорията. Сыллата бу сир дьэрэкээн сибэккинэн симэнэр. Быйыл Арктикатааҕы агротехнологическай университет куорат сүрүн общественнай сирдэрин сибэккинэн киэргэтэр. Сыллата үөрэх кыһата куораты көҕөрдүүгэ ылсан үлэлэһэр. Сарсыардаттан устудьуоннар, преподавателлэр кэлэн үлэ үөһүгэр түстүлэр.

Николай Сидоров, АГАТУ устудьуона: «Кыратык хаһабыт, кыратык уу кута түһэбит. Оннук гынан баран рассаадабытын олордобут уонна көмөбүт».

Сибэкки олордуута туспа түбүктээх. Бастаан буорун бэлэмнээн, рассадалары кичэйэн силистэрин алдьаппакка олордуу ирдэнэр.

Ирина Гоголева, АГАТУ кафедратын доцена: «Бырайыагынан бу клоун сирэйэ буолуохтаах. Петунья, лобелия, колиус өҥнөрүнэн биир ситим тахсыахтаах».

Дьокуускай көҕөрдүүтүгэр куорат араас тэрилтэлэрэ, үөрэҕин кыһалара күүс-көмө буолаллар, бу маннык үүнээйи рассадаларынан  хааччыйаллар. Арктикатааҕы агротехнологическай университет муниципальнай хантараагынан 4 бөдөҥ эбийиэккэ сибэкки олордуохтаах. Ол курдук чуолаан Киин уонна Губинскай уокурук территориятын сибэккинэн киэргэтэллэр.  

Василий Чичигинаров, АГАТУ преподавателэ: «Быйыл муниципальнай хантараагынан 4 эбийиэккэ үлэлиэхтээхпит. Циркэҕэ 2000 тахса сибэкки олордуллар».

Дьокуускай үрдүнэн тулалыыр эйгэни көҕөрдүү үлэтин бараҕай былаана олоххо киирбитэ быйыл 4-с сыла. 2021 сыллаахтан буоларын курдук, дьэрэкээн сибэккилэри эрэ буолбакка, өр сылга үүнэр сэппэрээктэри, талахтары, мастары олордууну киллэрбиттэрэ.  Кыайыы паркатыгар быйыл 160 маһы олортулар. Паркаҕа бу кэнники сылларга уопсайа 12 тыһыынча күөх үүнээйини олордон кэллилэр.

Илона Максимова, СӨ экология министиэристибэтин сүрүн исписэлииһэ: «Иллэрээ сыл бэс уонна хатыҥ олордубуппут, сирбит хаппырыыстыыр буолан харыйа олордубуппут, онтукабыт үчүгэй уопут көрдөрдө».

Көҕөрдүү тэрээһинин чэрчитинэн, быйыл киин куоракка уопсайа 1 мөлүйүөн кэриҥэ сибэкки олордуохтара. Көҕөрдүү үлэлэригэр аҥардас сири булларыы эрэ буолбакка, көрүү-истии, бүөбэйдээһин үлэтэ эмиэ киирэр.