Саҥардыллыбыт пляж быйыл аан бастакы сезонун арыйарга бэлэмнэнэр

Водолаз анал таҥаһын кэтэн ууга киирэр. Бастаан уу анныгар үлэлээччи балтараа миэтирэ дириҥҥэ үлэлиир. Оттон ууга киирэригэр кини хайаан да тростаах итиэннэ биэрэккэ баар быыһааччылары кытта сибээскэ баар буолар.

Дьулустаан Бережнёв, СӨ быыһыыр сулууспатын водолаз-быыһааччыта: «Хайаан да сибээс баар буолуон наада. Ууга сэрэхтээх буолуохха наада».

Час курдугунан водолаз уу аннын көрөн биир улахан хоппону хостоон таһаарда. Кини бэтэрээ балтараа-икки миэтирэ дириҥҥэ сырытта. Күн устата өссө хаста да ууга киириэҕэ.

Пётр Тимофеев, СӨ быыһыыр сулууспатын водолаз-быыһааччыта: «Вода прибыла, глубина небольшая, берег пологий, и сильно большого хлама нет, так как до этого ребята уже чистили пляж. В основном только картонки и мелкие камни».

Дьон ууга куттала суох сынньанарыгар анаан сыллата сөтүө кэмэ саҕаланыан иннинэ водолазтар кэлэн хайаан да уу аннын араас бөхтөн-сыыстан ыраастыыллар. Кыра бөхтөн саҕалаан, араас тимиргэ тиийэ барытын хомуйаллар. Быйыл улахан бөх суох диэн бэлиэтээтилэр.

Дьаамалары барытын үөрэтэн бу сөтүөлүүр сир ханыаха диэри көҥүллэнэрин бэлиэтииллэр. Оччотугар пляж салалтата карта оҥорон анал туһааннаах уу бэлиэлэрин туруорар.

Оттон водолазтар ууга үлэлиир кэмнэригэр биэрэккэ эмиэ үлэ күөстүү оргуйар. Дьон олорон сынньанар ыскамыайкаларын саҥардыы, хаамар сирдэри кумахтан ыраастааһын итиэннэ хаалбыт быстах өрөмүөн үлэлэрэ ыытыллаллар. Даҕатан эттэххэ, бу 202 дьоҕус түөлбэҕэ баар куораттааҕы пляжка ааспыт сыл күһүнүгэр оннуттан өрөмүөн үлэтэ барбыта. Онон быйыл саҥардыллыбыт пляж аан бастакы сезонун арыйарга бэлэмнэнэр.

Виктор Обутов, Дьокуускай куорат тас көстүүтүн көрүүгэ,  тупсарыыга сулууспатын дириэктэрэ: «Туалет баар буолуоҕа, ийэ-оҕо хоһо баар буолуо. Утах, аһылык киоскалара баар буолуоҕа».

Онон куораттааҕы пляжка дьон сынньанарыгар бары усулуобуйа олохтонно. Кэлэр нэдиэлэҕэ бары үлэлэр түмүктэнэннэр сөтүө кэмэ арыллыаҕа.