Медицинэ национальнай киинигэр хирургическай уонна уорганнары трансплантациялыыр саҥа салаа аһылынна

Саха сирин медицинэтин сайдыытыгар дьоһун хардыы. Медицинэ национальнай киинигэр саҥа транплантация салаата баар буолла. Салаа үөрүүлээх аһыллыытыгар доруобуйа харыстабылын миниистирэ Лена Афанасьева, медицинэ киинин салайааччы Станислав Жирков, трансплантолог хирурдар, быраастар кытыннылар. Быһа сибээһинэн Москваттан дойду сүрүн трансплантолога, научнай-чиничйэр киин салайаачыта, академик Сергей Готье кытынна.

Василий Самсонов, 1№-дээх хирургия уонна уорганнары трансплантациялыыр салаа сэбиэдиссэйэ : «Урут сылга 4-5 пересадканы оҥорор буоллахпытына, номнуо быйыл 15 пересадка оҥоруохтаахпыт. Быар уонна бүөр пересадкалара. Эппэрэссийэҕэ киириэхтээх дьоннор манна киирэн көрдөрүнэллэр, манна уонна эппэрээссийэ ааһаллар».

Саха сиригэр уорганы олордуу бастакы президеммит Михаил Николаев кэмигэр саҕаламмыта. 1999 сыллаахтан бэлэмнэнии баран 2001 сыллаахха аан бастакытын ыарыһахха бүөрү олорпуттара. Салгыы бу хайысханы баһылаан, 2016 сыллааха аны быар олордуута табыллыбыта, онтон 2018 сыллааха Уһук Илиҥҥэ аан бастакытын саха хирурдара сүрэҕи ситиһиилээхтик олордон үлэ саҕаламмыта. 

Станислав Жирков, СӨ Михаил Николаев аатынан медицинэ национальнай киинин генеральнай дириэктэрэ: «Бүтэһик сылларга элбэх бэлэмнэнии үлэтэ барда, эдэр көлүөнэ быраастары бэлэмнээһин. Биһиэхэ олус улахан көмөнү научнай-чиничйэр киин салайаачыта, академик Сергей Владимирович Готье оҥордо. Манна хас да биригээдэни, эдэр исписэлиистэрбитин үөрэтэн».

Бүгүҥҥү күҥҥэ каадырдарынан, туһааннаах оборудованиенан хааччыллан, салаа толору кыаҕынан үлэлииргэ бэлэм. Саха сиригэр уорганнары олордуу реестрыгар чуолаан бүөргэ 60 киһи, быарга 12 киһи уочаракка турар. Сыллата трансплантация эппэрэссийэтин ахсаанын элбэтэн туһааннаах ыарыһахтарга көмө оҥоһуллуоҕа.

Алквиад Булатов, клиническэй киин дириэктэрэ: «Трансплантацияҕа наадыйар ыарыһах күнтэн-күн элбээн иһэр. Ол иһин соҕуруу игин барбакка, биһиги бэйэбит эппэрээссийэлэнэллэрэ ордук туһалаах буолуо этэ».

Онон өрөспүүбүлүкэҕэ медицинэ саҥа таһымҥа тахсан, уорганы олордуу курдук уустук хайысха ситиһилиннэ.