Дьокуускайга "Спортивные якутяне" Саха сирин үөрэнээччилэрин спартакиадата салҕанар

Спартикада Кыайыы уотун уматтылар. Уоту уматыы сиэрэ-туома үгэс быһыытынан Арчы дьиэтигэр буолла. Бу уот аны Туймаада стадионугар, Спартакиада арыллыытыгар  тиийиэхтээх.

Туймаада стадионугар хамаандалар парааттара саҕаланна. Өрөспүүбүлүкэ таһымнаах күрэххэ улуустар бары кытталлар. Барыта 30 хамаанда,  тыһыынчаттан тахса оҕо кэлэн бастыыр иһин киирсэллэр.

Мичийэ Иванова, СӨ үөрэнээччилэрин спартакиадатын кыттыылааҕа: «Быйыл мин бастакыбын спартакиадаҕа кыттабын. Волейбол хамаандабытынан сарсын үһүс миэстэни былдьаһабыт, Мииринэй хамаандатын кытта оонньуубут. Парад наһаа үчүгэй, оҕо бөҕөтө баар. Кэнсиэр игин буолуо дии саныыбын».

Айыллаана Саввина, СӨ үөрэнээччилэрин спартакиадатын кыттыылааҕа: «Тустууга күрэхтэһэбин, 14 оҕо буолан кэллибит. Үчүгэйдик ааһар ини».

Арина Пестрякова, СӨ үөрэнээччилэрин спартакиадатын кыттыылааҕа: «Кыайыыга эрэлим баар. Былырыын миэстэлэспэтэҕим. Наһаа үчүгэй, оһуобай атмосфералаах».

Ньургуйаана Илларионова, Амма улууһун баһылыгын солбуйааччы: «Кыайыыга эрэллээхпит. Биһи көрүҥҥэ барытыгар кыттабыт. Күн-бүгүн манна биһигиттэн 73 оҕо кэлэн кытта сылдьар. Оҕолорбор улахан ситиһиини баҕарабын».

Ил Дархан Айсен Николаев кыттааччылары Спартакиада саҕаламмытынан эҕэрдэлээтэ, кыайыыны-хотууну баҕарда. Бу күрэх спордунан дьарыктанар оҕолор сайдалларыгар өссө төһүү күүс буолуо диэн баҕа санаатын эттэ.

Айсен Николаев, СӨ Ил Дархана: «Сахам сирин ытык мааны дьоно-сэргэтэ, бука барыгытын бүгүҥҥү үөрүүлээх киэһээннэн. Дьокуускай куоракка Туймаада стадиоҥҥа Саха сирин үөрэнээччилэрин спартакиада арыллар киэһээтэ үүммүтүнэн итии-истиҥ эҕэрдэ».

Бу күннэр устата оҕолор сүүрүүгэ, тустууга, буоксаҕа, волейболга уонна да атын көрүҥнэргэ күөн көрсүөхтэрэ. Оҕолор сылы быһа күүппүт күрэхтэригэр бэлэмнэрэ үрдүк таһымнаах.

Волейболга бастакы күн түмүгүнэн хамаандаларга быһарыы тахсар. Онон саала иһэ тыҥааһыннаах киирсиилэринэн оргуйан олорор. Таатта улууһун хамаандата бу спартакиадаҕа былырыынныттан бэлэмнэнэн саҕалаабыт, онон  кыайыыга эрэллээхпит диэн этэллэр.

Николай Турнин, СӨ үөрэнээччилэрин спартакиадатын кыттыылааҕа: «Волейбол үчүгэй буоллаҕа. Оонньуубут буоллаҕа бэйэбит, характербытынан, туохпутунан барыбытынан киирсэн».

Спартакиада бэс ыйын 8 күнүгэр түмүктэниэҕэ. Бастыҥ спортменнар уонна кыайыылаах хамаандалары Туймаада стадионугар чиэстиэхтэрэ.