Саха сиригэр ыһыахха бэлэмнэнии кэмэ саҕаланна

Мария Николаевна бу иистэнэр сыахха үлэлээбитэ 10-тан тахса сыл буолла. Онон уопуттаах, элбэх үөрэнээччилээх. Хас биирди сакаас ураты, туспа ис хоһооннох диэн кэпсиир.

Мария Юмшанова, иистэнэр сыах дириэктэри солбуйааччы: «Хас биирдии сахалыы таҥаска Үөһээ Дойдуттан көрдөһөбүт таҥас тикпит киһибитигэр үчүгэйдик олордун, киһи санаатын көннөрөр буоллун диэн».

Иистэнньэннэр билигин улахан сакааска олорор буолан, үлэлэрин үгэнэ. Сыах Саха сиригэр үрдүк таһымнаах ыытыллар тэрээһиннэр таҥастарын-саптарын бу сыллар устата тигэн кэллэ, онон үөрүйэхтээхтэр. Күн бүгүн сыах икки хайысханан үлэлии олорор.

Александра Колесова, иистэнэр сыах дириэктэрэ: «Бүгүҥҥү күҥҥэ биһи тэрилтэбит икки хайысханнан үлэлии сылдьар. Бастакы – нэһилиэнньэҕэ саха таҥастарын тигэн атыылыыбыт. Иккис – нэһилиэнньэҕэ, тэрилтэлэргэ, тэрээһиннэргэ таҥас тигэр өҥөнү оҥоробут».

Маны таһынан бу сыах нэһилиэнньэҕэ үлэ миэстэтин хааччыйа олорор. Сыллата устудьуоннар кэлэн практикаларын ааһааллар, элбэх уопуту ылаллар. Онон бэйэлэрин идэлэрин толору баһылыылларыгар улахан күүс-көмө буолар. 

Варя Петрова, иистэнньэн: «Мин ЯИПК үөрэҕин бүтэрбитим. Уруккуттан иистэнньэҥмин. Элбэххэ үөрэнним. Харахпынан барытын оҥоробун».

Бу иистэнэр сыах үлэтин-хамнаһын 2011 сылтан саҕалаабыта. Бастаан кыраттан саҕалаабыт буоллахтарына билигин сыах сыллааҕы оҥорон таһаарар көрдөрүүтэ 500 тыһыынчаттан тахса. Саха сириттэн эрэ буолбакка Арассыыйаттан, атын дойдуттан тиийэ сакаастыыллар. Инникитин сыах өссө кэниир, оҥорон таһаарар көрдөрүүтүн элбэтэр былааннаах.