Саха сиригэр сааскы халаан иккис долгуна ааһар

Саха сирин өрүстэригэр хара уу кэлиитэ салҕанар. Алдан өрүскэ Алдан улууһун кэннэ аны уустук балаһыанньа Уус Маайа улууһугар бэлиэтэнэр. Манна хара уу таһыма көмүөл саҕанааҕы көрдөрүүттэн бүтүн 4-6 миэтэрэнэн үрдүк. Аҥардас биир суукка иһигэр уу таһыма 14-36 см диэри үрдээбит. Петропавловксай-Эльдикээн учаастакка хара уу муҥутаан кэлиитэ бэс ыйын 5-6 күннэригэр күүтүллэр. 

Пётр Аргунов, Өлүөнэтээҕи уу салалтатын салайааччы: «Томпо улууһугар уу таһыма үрдүөхтээх. Икки күн иһинэн 10-20 см дылы сууккаҕа уу таһыма эбиллэн биэриэҕэ. Алдан салгыы Таатта, Уус Алдан улууһугар устар. 3 күнүнэн уу таһыма үрдүөҕэ, 10-35 см дылы үрдүөҕэ. Бүлүү өрүскэ хара уута эмиэ киирэ турар».

Сунтаар улууһугар уу таһыма түһэр, онтон Ньурба, Үөһээ Бүлүү икки ардыгар эбиллэр. Өлүөнэ эбэбитин ылар эбит буоллахха, Ленскэйтэн Өлүөхүмэ улуустарыгар уу таһыма түһэ турар.Онон бэтэрээ чуолаан Покровскай-Дьокуускай-Сангаар эргин хара уу кэлиитэ көхтөөх. Кэбээйи улууһугар уонна Дьокуускай куорат таһынан Өлүөнэ өрүс уутун таһыма 474 см тэҥнэһэр.

Киин куоракка хара уу муҥутаан сарсын бэс ыйын 6 күнүгэр кэлэрэ күүтүллэр, ол кэнниттэн уу таһыма түһэн барыа. Кутталлаах бэлиэни аһарара күүтүллүбэт. Уу кэлбитин нэһилиэнньэ сэргиир. Ким көрө кэлэр, ким балыктыыр, ким көннөрү сынньанар.

Октябрина Корнилова, Дьокуускай олохтооҕо: «Наһаа сөбүлүүбүт манна кэлэрбитин. Баччаларга хайаан даҕаны үөрэ-көрө кэлээччибит уонна уруйдуубут-айхаллыыбыт».

Саргылаана Слепцова, Дьокуускай олохтооҕо: «Луук хомуйа баран испиппит, ону бу уу кэлэн лууктаабат буоллубут».

Оттон хоту Сааскылаахха саас кэллэ. Анаабыр өрүс бэҕэһээ бэс ыйын 4 күнүгэр эстэн муус хойуутук устар. Дьааҥы, Индигир уонна Халыма өрүстэригэр уу араас тэтимнээхтик түһэ турар. Ардах түһэн, кылгас кэмҥэ Дьааҥы уҥа салаатыгар Адыаччыга уу үрдүү сырытта. Бүгүҥҥү күҥҥэ Алдан уонна Анаабыр өрүстэр туруктара гидрометеосулууспа Салалтатын тус хонтуруолугар сылдьаллар. Исписэлиистэр төгүрүк суукка устата балаһыанньаны кэтииллэр.