Дьон олоҕор куттал суоһаатаҕына бастакынан көмөҕө кэлээччилэргэ биир түбүктээх кэм саҕаланна

Суһал ыҥырыы киирээтин кытта быыһааччылар тута массыынаҕа ыстаналлар. Маннык түгэҥҥэ кинилэр куруук бэлэмнэр. Быыһааччыларга күннэтэ араас суһал ыҥырыы киирэр.

Евгений Воробьёв, СӨ быыһыыр сулууспатын дьуһуурунай диспетчера: «Вызовтар киирэ тураллар, барытын ылан иһэбит. Баһаар кэмэ буола турар. Дьон сүтүүтэ үксэ балыксыттар, булчуттар».

Бу аҕыйах хонуктааҕыта быыһааччылар Уус Майаҕа суһал көмөҕө наадыйбыт табаһыты киин балыыһаҕа аҕаллылар.  Табаһыт уол көтөр аал сатаан түспэт сиригэр баар буолан манна быыһааччылар бөртөлүөттэн анал быанан түһэн туһааннаах тэрил көмөтүнэн ыалдьыбыт уолу таһаардылар.

Николай Макаров, СӨ быыһыыр сулууспатын быыһааччыта: «Усложняло отсутствие солнечного света, очень не удобно было и наличие высоких деревьев. Изначально планировали приземлиться, но так как подходящей площадки не было, пришлось использовать лебедочную систему».

Маннык ыксаллаах быһыыга-майгыга өрүү бэлэм буолар ирдэнэр. Онон хас биирдии быыһааччы сыл аайы хайаан да үөрүйэҕи тургутар үөрэҕи ааһаллар. Холобура, бу бөртөлүөттэн түһүүнү хас биирдии быыһааччы баһылыахтаах.

Оттон бу быыһааччы-водолазтар Бүлүү өрүскэ тимирбит массынаны хостуу сылдьаллар. Манна хомойуох иһин, киһи өлүгэ булулунна. Бу ыам ыйын 29 күнүгэр сүппүт киһини олохтоох дьаһалта бэйэ күүһүнэн көрдүү сатаабыта. Онтон бу бэс ыйын 2 күнүгэр өрүскэ нефть тохтубут суола баарын көрөн быыһааччы водолазтары ыҥырбыттар. Оттон сайыҥҥы бириэмэҕэ бу маннык курдук түбэлтэ ордук элбэхтэ бэлиэтэнэр.

Роман Герасимов, СӨ быыһыыр сулууспатын быыһыыр-көрдүүр үлэҕэ салалтатын салайааччытын солбуйааччыта: «Билигин халаан уутун кэннэ хара уу кэлэ турар, ону дьоннор алҕаска хаайтаран хаалааччылар билбэккэ. Ону таһынан бу сайын баһаарбыт үлэтэ саҕаланар».

Онон мантан сайын быыһааччыларга түбүктээх кэм күүтүллэр. Ойуур баһаардара, тыаҕа сүппүт дьону көрдөөһүн, ууга түспүттэргэ суһал көмө бу барыта быыһааччылар күннээҕи үлэлэрэ.