Саха сиригэр хаарбах дьиэттэн көһөрүү үлэтэ былааннаахтык барар
Сайыҥҥы куйаас, кыһыҥҥы тымныы аахсыллыбат. Аны сотору кэминэн Дьокуускай куорат 17-с кыбаартала саҥа тыыннаныа. Билигин манна Спортивнай кыбаарталы тутуу үлэтэ тэтимнээхтик барар турар. Саҥа олорор дьиэлэр хаарбах дьиэттэн көһөрүү быраграманан тутулла тураллар.
Кыбаартал кырдьаҕас олохтооҕо Петр Петрович хаарбах дьиэттэн көһөрүү быраграмаҕа киирэн, уочааратын күүтэ олорор. Тутуу тэтимнээхтик барарын күн аайы көрөн үөрэр.
Пётр Тимофеев, 17-с кыбаартал олохтооҕо: «Саҥа дьиэлэри туталлар үчүгэй бөҕө. Ол гынан баран эргэ дьиэҕэ олорооччулары хаһан көһөрөллөрө буоллар. Звезднайга көһөрүөхпүт диэбиттэрэ. Тулабытыгар дьоннор көстүлэр, биһи эрэ хаалан хааллыбыт».
Бу тутулла турар саҥа эбийиэк 10 тыһю тахса кв.м. иэннээх, 11 мэндиэмэннээх. Тутуу үлэтэ 2027 сылга түмүктэниэхтээх. Манна олорор дьиэлэр эрэ буолбакка эбии оҕо уһуйаана, спортивнай киин тутулла турар. Онон силигин ситтэҕинэ куорат биир сайдыылаах оройуона буолуоҕа.
Алексей Соколов, Дьокуускай куорат дьиэ - уот сыһыаннаһыыларыгар Департаменын салайааччытын солбуйааччы: «Быйыл Дьокуускайга 508 мөл. көрүлүннэ 4 хаарбах туруктаах дьиэни көһөрөргө. Спортивнай кыбаарталы 2030 сылга дылы бүтэриэхтээхпит».
Хаарбах дьиэттэн олохтоохтору көһөрүү Өрөспүүбүлүкэ биир сүрүн соруга. Көһөрүү федерельнай уонна республиканскай быраграманан уочарат быһыытынан барар. Дойду Президенэ көҕүлээһининэн ыытыллар "Инфраструктура для жизни" национальнай бырайыак чэрчитинэн оҥоһуллар.
Матрёна Старостина, СӨ олорор дьиэни-уоту тутуу Дирекциятын программалары олоххо киллэриигэ салаатын сүрүн исписиэлииһэ: «2025-2030 сыллардааҕы бырагыраамабыт саҥа саҕаланыахтаах. Уопсайа Саха сирин үөрдүнэн 1030000 кв.м. бигэргэтиллэн турар буоллаҕына, аҥардас Дьокуускай куорат үрдүнэн 957 хаарбах дьиэ баар».
Санатан эттэххэ, 17 кыбаартал мас дьиэлэрин көтүрэн, 46 элбэх квартиралаах дьиэлэр тутуллуохтара. Уопсайа 327 тыһыынча квадратнай миэтирэ иэҥҥэ 13,5 тыһыынча киһи олохсуйуоҕа.
