Саха сиригэр бастакы сир аһа ситэр

Самаан сайын салаллан айылҕабыт барахсан уһун уутуттан уһуктан, үүнэн-ситэн сириэдийэн, чээлэй күөх киистэни анньынан турар кэрэ кэмэ. Оттон бу бэс ыйын саҕаланыыта күөх луук ситэн, дьон-сэргэ кыһыҥҥы хаһааһын булунар. Хоту дойдуттан төрүттээх Анна Александровна Эверстова сайыҥҥы сылаас күҥҥэ айылҕаҕа сынньана таарыйа чучунааҕы хомуйа сылдьар.

Анна Эверстова: «Күнү быһы күөх хонууга сылдьан хомуйаҕын эрээри сынньалаҥ. Кыраны кыһын тууһаан тоҥороору».

Анна Александровна хоту дойду киһи сиэринэн биһиги устар бөлөххө тутатына хомуйбут луугун амсатта. 

Бу Тулагы үрэҕин тэллэҕэр күөх луук сыллата үүнэр. Хас сыл ахсын олохтоохтор мантан бэйэ нуорматын толорон бараллар. 83-с хаарын уулларбыт Александра Николаевна Алексеева сөптөөҕүн хомуйан сынньана олорор. Билигин чучунааҕы хомуйуу кэмэ дьэ саҕаланан эрэр диир.

Александра Алексеева: «Эрдэ билигин. Хонуу барыта сибэкки буоллаҕына, оччоҕуна луук ситэр».

Оттон Черноградскайдар дьэ кэргэн оҕолуун-уруулуун бары кэлбиттэр. Алаһа дьиэ хотуна Василина Черноградская аҕыйах мүнүүтэ иһигэр биир тутум сир аһа илиитигэр баар буола түстэ. Кэрэ аҥар күөх луугу аска туттабыт уонна араас ньыманан кыһын хаһаанабыт диэн этэр.

Василина Черноградская: «Маннык 4 пакет. Кырбыыбыт, тууһуубут уонна тоҥорон кээһэбит».

Саха сиригэр күөх луук уопсайа уонча көрүҥэ үүнэр. Онтон саамай элбэхтэ көстөр ходуһага, хомоҕо, өрүс кытыыларыгар үүнэр норуокка этэллэринии көҥдөй, оттон наука тылынан лук-скорода буолар, онтон иккис, амтанныын да минньигэс, алаас сүмэһиннээх ото – чучунаах буолар.