Саха сирин уонна Забайкальскай кыраай кыраныыссатыгар үрдүк кылаастаах баһаардар туруохтарын сөп

Ойуур баһаардарын авиа кэтээһин бу мантан регионнааҕы диспетчерскэй сулууспаттан салайыллар. Сотору кэминэн Маҕан пуордуттан уот турбут сирдэрин кэтээһиҥҥэ көтүөхтэрэ. Итиэннэ үлэ хаамыыта барыта рациянан манна быһа биллэриллэ туруоҕа. Бу дьоҕус хоско өрөспүүбүлүкэҕэ ойуур баһаардарын балаһыанньата барыта түмүллэр. Ол курдук космостан кэтээн көрүү, авиа уонна видео кэтээһин.

Владислав Семенов, СӨ ойуур хаһаайыстыбатын регионнааҕы диспетчерскэй сулууспатын салайааччытын солбуйааччы: «Бу космомониториннаан баһаардары көрдүүбүт. 2 гектартан улахан буоллаҕына көстөр. Күҥҥэ үстэ хартыыҥката саҥардыллар».

Манна көстөрүнэн күөх тыа хоту улуустарга умайар. Ол курдук Дьааҥы, Муома, Эбээн Бытантай уонна Уус Майа.  Дьааҥы Алыһардааҕар уонна Эбээн Бытантайга Дьарҕалааҕар уот нэһиликкэ чугаһаан кутталы үөскэтэ сырытта. Манна Дьокуускайтан анал рейсынан эбии 40 умуруорааччы көппүтэ. Маныаха күүстээх ардах түһэн уоту кыайдылар. Онон нэһилиэнньэлээх пууннарга куттал уҕараата.  

Петр Терентьев, СӨ ойуур хаһаайыстыбатын регионнааҕы диспетчерскэй сулууспатын салайааччыта: «Күн саҕаланыаҕыттан 9 ойуур баһаара 10471 га. умайа турар. Ол онтон 5 баһаарын эргийбиттэрэ 5165 гектарга. Умулларыыга 123 киһи сылдьар уонна 8 тиэхиникэ».

Күн бүгүн баһаартан сэрэхтээх буолуу үрдүкү кылаастаах сирдэригэр сөҥүүнү ыҥырар сөмөлүөт былыттары ытар. Ол курдук  Як-40 Томпо уонна Өймөкөөн улуустарыгар үлэлээтэ. Дьааҥы, Уус Алдан, Эбээн Бытантай улуустарыгар уонна  Дьокуускайга уонна Жатайга  баһаартан сэрэхтээх буолууо эрэһиимэ салҕанар.   Бу сылга Өлүөхүмэҕэ уонна Ленскэйгэ кураанах этиҥтэн күөх тыа умайа сырытта. Билигин баар баһаардар барыта киһи дьалаҕай сыһыанын түмүгэр барбыт уоттар.

Андрей Коноплев, СӨ Экология миниистирин солбуйааччы: «Отмечу, что основной причиной пожаров является человеческий фактор. Ведется профилактическая работа и патрульно рейдовые мероприятия. С начала сезона установлено 40 виновников природных пожаров, составлено 88 протоколов за нарушения правил пожарной безопасности в лесах».

Саҥа тахсар баһаардары күннэтэ авиациянан уонна космостан устуунан кэтэнэр. Уоту кыра эрдэҕинэ булан, умулуннарыы бастакы сорук.