Дьокуускайга көҕөрдүү үлэтэ ыытыллар

Кыайыы паркатыгар үгэскэ кубулуйбут "Өйдөбүл саада" мас олордуутун аахсыйата буолла. Манна куорат, өрөспүүбүлүкэ дьаһалтатыттан, экология министиэристибэтиттэн, уокурук салалтатыттан, тэрилтэлэртэн кэлэн кытыннылар. Быйыл 160 маһы олортулар - хатыҥы уонна харыйаны. 4 сыл устата манна уопсайа 12 тыһыынча араас маһы олордон кэллилэр. 

Илона Максимова, СӨ экология министиэристибэтин сүрүн исписэлииһэ: «Иллэрээ сыл бэс уонна хатыҥ олордубуппут, сирбит хаппырыыстыыр буолан харыйа олордубуппут, онтукабыт үчүгэй уопут көрдөрдө».

Мастары, чуолаан харыйалары, тастан сакаастаан аҕалан олордо сылдьыбыттара - кыайан кыстаабакка үчүгэйдик үүммэтэхтэрэ. Онон олохтоох харыйаны олордон үтүө түмүк баар. Маны тэҥэ, сыллата олордуллубут мастары көрөн-истэн, уу кутан үүнүү көдөрүүтэ үрдүк. Былаан быһыытынан, парка тулатыгар барытынан маһы олордуохтаахтар.

Валентина Егорова, Дьокуускай олохтооҕо: «Мас олордуутугар куруук кэлэбит. Сылдьар сирбит буолан куруук тэрээһиннэргэ кыттан иһэбит».

Дьокуускай үрдүнэн тулалыыр эйгэни көҕөрдүү үлэтин бараҕай былаана олоххо киирбитэ быйыл 4-с сыла. 2021 сыллаахтан буоларын курдук, дьэрэкээн сибэккилэри эрэ буолбакка, өр сылга үүнэр сэппэрээктэри, талахтары, мастары олордууну киллэрбиттэрэ. Дьокуускай көҕөрдүүтүгэр куорат араас тэрилтэлэрэ, үөрэҕин кыһалара күүс-көмө буолаллар, үүнээйи рассадаларынан хааччыйаллар.

Айысхаана Васильева, агрономия уонна химия кафедратын преподавателэ: «Куораты көҕөрдүүгэ ылсан үлэлиибит. Петуньяларбыт, бархатцыларбыт куораты көҕөрдүү чэрчитинэн бараллар».

Көҕөрдүү тэрээһинин чэрчитинэн, быйыл киин куоракка уопсайа 1 мөлүйүөн кэриҥэ сибэкки олордуохтара. Көҕөрдүү үлэлэригэр аҥардас сири булларыы эрэ буолбакка, көрүү-истии, бүөбэйдээһин үлэтэ эмиэ киирэр.

Екатерина Павлова, Дьокуускай куорат баһылыгын көҕөрдүү үлэтигэр сүбэһитэ: «В этом году у нас два больших проекта по озеленению в городе. Это – улица Набережная Романа Дмитриева и площадь Победы. На этих объектах мы планируем устройство системы автоматического полива. Это для нас первый опыт для городского озеленения».

Быйылгы дьылга сүрүн болҕомто мас, итиэннэ өр сыллаах үүнээйилэри үүннэриигэ ууруллуоҕа. Ый устата куорат уокуруктарынан маһы олордуу тэрээһинэ ыытыллыаҕа. Онтон бу нэдиэлэттэн сибэкки олордуутун саҕалыахтара.