Дьокуускайга иккис төгүлүн Аҕа дойдуну көмүскээччилэр кубоктарын күрэхтэһиитэ ыытылынна

Ордук элбэх кыттааччы остуол тенниһигэр муһунна. Манна хас биирдии хамаандаттан бэрэстэбиитэл баар. Ол курдук, 14 байыас бу көрүҥҥэ бэйэ кыаҕын холонор. Ньурбаттан төрүттээх Николай Матвеев ааспыт сыллааҕы күрэх кыайыылааҕа. Быйыл титулун көмүскүү эмиэ теннискэ күрэхтэһэргэ санаммыт. Кини 2024 сыллаахха анал байыаннай дьайыыга сылдьан бааһыран дойдутугар төннөн кэлэн билигин реабилитация ааһа сылдьар. Уонна оттон этин-хаанын чэбдигирдэ кыралаан спордунан дьарыктанан саҕалаатым диир.

Николай Матвеев, күрэхтэһии кыттыылааҕа: «Бу курдук күрэхтэһии ыытыллара үчүгэй. Тоҕо диэтэххэ, сэриигэ сылдьыбыт дьоннор ыарахан кэми ааспыт дьоннор, бу курдук аралдьыйыахтарын наада дии саныыбын. Спорт өттүгэр дьарыктанар ордук үчүгэй».

Байыастар уопсайа 6 көрүҥҥэ күрэхтэһэллэр. Манна хас биирдии спортсмен бэйэтэ талан баҕарар итиэннэ бэлэмнээх көрүҥэр суруттаран тутатына холонон көрөр. Тэрийээччилэр бэлиэтииллэринэн быйыл кыттааччы ахсаана биллэ элбээбит.

Константин Копылов, күрэхтэһии кылаабынай судьуйата: «Уолаттар бэлэмнэниилэрэ үчүгэй. Сылтан сыл сатабыллара күүһүрэн иһэр. Бастаабыт уолаттар Өрөспүүбүлүкэ сүүмэрдэммит хамаандатыгар киирэллэр уонна Южно-Сахалинск барыахтаахтар».

Тустаах тэрээһин сүрүн сыала-соруга бастатан туран бааһыран кэлбит байыастары эттэрин-хааннарын чөлүгэр түһэриигэ маны тэҥэ уйулҕа да өттүнэн бу эмиэ улахан көмө. Сүрүн тэрийээччи адаптивнай спорт көрүҥнэрин киинэ буолар. Манна анал байыаннай дьайыы бэтэрээннэрэ спорт көмөтүнэн реабилитацияны ааһыахтарын сөп.

Ньургун Иванов, СӨ адаптивнай спорт көрүҥнэригэр киинин дириэктэрэ: «Кинилэри кытта ыкса үлэлиибит.  Быраас нөҥүө талбыт көрүҥнэригэр тренердэр дьарыктыыллар».

Онон спордунан дьарыктаныан баҕалаах байыастарга киин аана мэлдьи аһаҕас. Туһааннаах исписэлиистэр, тренердэр көмөлөрүнэн эрчиллэн салгыы бу күрэхтэһиигэ кыттыахха сөп. Оттон бу регионнааҕы күрэх кыайыылаахтара Сахалиҥҥа Уһук Илиҥҥи федерльнай уокуруктааҕы кубокка Саха сирин аатын көмүскүү барыахтара.