Юрий Трутнев дрон оҥоруутун сыаналаата

Уустук чаастары бэйэ бэйэтигэр холбоон олохтоох инженердэр пилота суох көтөр аалы таҥаллар.  Саха сирин оҥорон таһаарыытын Арассыыйа президенын Уһук Илиҥҥэ боломуочуйалаах бэрэстэбиитэлэ Юрий Трутнев сыаналыыр.  Дрон үгүс өттө бу лабораторияҕа оҥоһуллан тахсар. Маныаха анаан туһааннаах мастарыскыайдарга толору үлэлиир кыах тэриллибит.

Андрей Андреев, пилота суох көтөр аал лабораториятын салайааччы:  "Манна 3Д принтердар бааллар, пайкалыыр, хомуйар сирдэр бааллар. Ону таһынан тимир контрукциялары оҥорор сыахтар бааллар. Манна тэрилтэлэр бэйэлэрин бырайыактарын олоххо киллэрэллэригэр к;;с-көмө буолабыт". 

Бу лаборатория ааспыт сыл ахсынньытыгар "Технопарк" иһинэн тэриллибитэ. Юрий Трутнев дрон оҥоруутун көрөн баран саҥа технологияны сайыннарыы өрүү өйөнөрүн эттэ. Итиэннэ анал байыаннай дьайыыга барар бородууксуйаны тириэрдииннэн эрэ муҥурдаммакка, дрон оҥоһуута өссө тупсарын туһугар ситими быспаты эттэ.

Юрий Трутнев, Арассыыйа Бэрэсидьиэнин  Уһук Илиҥҥэ боломуочуйалаах бэрэстэбиитэлэ:  "Пуорум айарга- утатарга баҕалаах, харахтара уоттаах олус элбэх киһини түмтэ. Мин санаабар, бу саамай сүрүн ситиһии ".

Олохтоох лаборатория кыаҕа киэҥ. Ол курдук ыйга 5 тыһыынчаҕа тиийэ дрон араас чаастарын оҥорон таһаарар. Бу хайыха өрөспүүбүлүкэҕэ тэтимнээхтик сайдар. Ол курдук лаборатория салайыытынан 17 оскуолаҕа  куруһуок үлэлиир. Итини кэргэ Сибээс колледжыгар анал киин тэриллэн пилота суох көтөр ааллары сайыннарыыга төһүү буолар. Дрону оҥоруу  айан-тутан таһаарыы биир кэскиллээх хайысхата.

Айсен Николаев, СӨ Ил Дархан:  "Дойдуга ыллыбыт креативнай экономика сокуона үлэлээн саҕалыахтаах. Бу сокуон оҥоһуллуутугар биһиги көхтөөх кыттыыны ылбыппыт. Билигин бу барыта олоххо туһаныллыан наада. Айар-тутар дьоҕурдаах бачча элбэх киһи мустубутуттан олус диэн үөрдүм".  

Пуорум чэрчитинэн араас регионнартан бэйэлэрин бородууксуйаларын көрдөрүүгэ уопут атастаһыыга аҕалбыттар. Онон бу хайысха Уһук Илиҥҥэ сайдыытыгар күүстээх сыһыан олохтонно.

Роман Ноев, "Геоскан" тэрилтэ суолталаах закаастары оҥоруу салаатын салайааччы,  Москва к.:  "Регион климатын, суолун-ииһин учуоттаан туран оҥоһуллубут бородууксуйабыт улахан көдьүүстээх буолуо дии саныыбыт". 

Маны тэҥэ  "Дойдуга бэриниилээх буолуу" диэн урутаан сайдыы территория үлэтин-хамнаһын кытта билистэ. Манна анал байыаннай дьайыыга анаан оҥоһуллар тиэхиньикэни көрдөрдүлэр.