"Уһук Илиҥҥэ айылынна" диэн норуттар икки ардыларынааҕы пуорум үлэлиир
Пуорум Арассыыйа регионнарыттан, тас дойдуттан кыттааччыны биир сиргэ түмтэ. Киэҥ далааһыннаах тэрээһиҥҥэ Саха сирэ айар уратытын билиһиннэриэҕэ, атын регионнары кытта уопут атастаһыаҕа.
"бу күн устата пуорум кыттааччылара хас да былаһаакканан үлэлиэхтэрэ, уопут атастаһыахтара. Маны таһынан култуура бырагыраамата олус киэҥ. Олохтоохтору хас күн аайы болуссаттарга кэнсиэрдэр, маастар-кылаастар күүтэллэр", - Ирина Гольдерова, корреспондент.
Форумҥа барыта 30-тан тахса регион кытта кэлбит. Үлэ хас да хайысханан барар, оттон сүрүн тэрээһиннэр "Үлэ кыбаарталыгар" ыытыллыахтара. Манна хас биирдии регион бэйэтин култууратын, уратытын, саҥа бырайыактарын көрдөрүүгэ аҕалбыт.
Бурятия өрөспүүбүлүкэтин делегацията саамай элбэх киһилээх. Эһиил креативнай кластер арыйар былааннаахтар, онон уопут атастаһа, сүбэ-ама ыла кэлбиттэр. Бу күннэр устата элбэҕи, саҥаны биллибит, иэйии ыллыбыт диэн этэллэр.
Соелма Дагаева, Бурятия Өрөспүүбүлүкэтин култуура миниистирэ: "Барытын илиибитинэн тутан-хабан көрдөбөт. Киинэ сайдыытыгар барар үлэни сэҥээрдибит. Таҥыллар технологиятын билистибит. Биллэн турар, Саха сирэ элбэх сыллаах уопутунан инники күөҥҥэ".
Пуорум чэрчитинэн турбут быыстапкаҕа ыалдьыттар сүрүн болҕомтолорун саха быһаҕа ылла.
Арассыыйа Дьоруойун Андрей Григорьевы билбэт киһи суоҕа буолуо. Дьоруой хорсун быһыыта уонна саха быһаҕа бүтүн аан дойдуга биллэр.
Андрей Григорьев – Тута, Арассыыйа Дьоруойа: "Саха быһаҕын биһиги харысхал курдук илдьэ сылдьабыт. Хапсыһыыга туттуллубат. Булка-алка туһанабыт".
Форум Уһук Илин уокурук креативнай эйгэтин уонна экономикатын сайыннарыыга туһуланар. Бу хайысхаҕа бииргэ үлэлэһии туһунан сөбүлэннэри түһэрсиэхтэрэ.
Ыалдьыттар айар-тутар идэлээхтэр билиилэрин, көрүүлэрин саҥа кэм технологиятын туһанан олоххо киллэрбиттэрин сөҕө көрдүлэр итиэннэ ону сайыннарыыга бары усулуобуйа тэриллибитин бэлиэтээтилэр.
Анатолий Курбанов, "Уһук Илиҥҥэ айылынна" норуоттар икки ардыларынааҕы форум кыттаччыта: "Саха сирэ креативнай экономиканы сайыннарыыга инники күөҥҥэ. Манна мин аҥаардас киинэ, муода хайысхаларын буолбакка айар-тутар экономиканы туһулаан этэбин".
Пуорум кэмигэр аһаҕас кэпсэтиилэр, төгүрүк остуол, маастар-кылаастар ыытыллыахтара. Маны таһынан ыалдьыттары, олохтоохтору араас интэриэһинэй тэрээһиннэр күүтэллэр.
