Быһааччылар бөртөлүөттэн түһүүгэ тургутууну ааһаллар

Десантниктар түргэн-тарҕан хамнанан бөртөлүөккэ сүүрэллэр. Тулагы- Киллэм нэһилиэгин аттынааҕы хонууга  Быыһыыр сулууспа үгэс буолбут үөрэх быһыытынан тургутуута ыытыллар. 40 тахса десантник хас да бөлөҕүнэн бөртөлүөттэн түһүөхтэрэ.

“бастакы бөлөх десентниктар түһэн саҕалаатылар. Күн-дьыл туругун учуоттаан билигин 20 миэтэрэ үрдүктэн түһэ сылдьаллар. Саамай үрдээбитэ 50 түһүөхтэрин сөп. Оттон бастакытын түһээччилэр 10 миэтэрэттэн холонуохтара”, - Ирена Осипова, корреспондент.

Быыһааччы-десантник Спиридон Капитонов бастакытын бөртөлүөттэн түһэргэ бэлэмнэнэр. Сэбин-сэбиргэлин, түһэргэ ирдэнэр малын-салын көрүнэр. Кини ааспыт сылтан Быыһыыр сулууспаҕа үлэлии киирбит. Сыл иһигэр бары үөрэҕи ааһан, аны тургутууга бу сатабылын көрдөрүөхтээх.

Спиридон Капитонов, Саха сирин быыһыыр сулууспатын аэромобильнай этэрээтин быыһааччыта: "Улахан долгуйуу суох. Бэлэмнэниибит үчүгэйдик ааспыта. Олунньу ыйтан ЫБММ полигонугар бэйэбит этэрээппитинэн тиһигин быспакка бэлэмнэннибит. Онон эт-хаан уонна уйулҕа өттүнэн бэлэммит үчүгэй".

Десантник эт-хаан эрэ  буолбакка, уйулҕа өттүнэн эмиэ бэлэмнээх буолара ирдэнэр. Ордук бу Спиридон курдук бастакыларын холонооччулары кытта сулууспа психологтара үлэлииллэр. Түһүү иннинэ хайаан да туруктарын көрөллөр, сүбэ-ама биэрэллэр.

Светлана Садовникова, Саха сирин Быыһыыр сулууспатын психолога: "Биһиги хайаан да кэпсэтии, сөптөөх тургутууну толотторон бэлэмнэрин быһаарабыт. Итиэннэ ити түмүгүнэн көҥүл биэрэбит".

Бу тургутууга десантниктар бары көҥүл ылбыттар. Саҥа холонооччулар туруктара эмиэ үчүгэй диэн психологтар сыаналаатылар. Оттон  олоххо дьиҥнэхтии буолар ыксаллаах быһыыга-майгыга бу тургутуу итиэннэ манна үөрэммит сатабыллара улахан көмө буолар.

Максим Колесов, Саха сирин быыһыыр сулууспатын аэромобильнай этэрээтин байыаһа, II-c кылаастаах быыһааччыта: "Өрүскэ муус харыытын эстэрэ сырыттахпына ыҥырыы киирбитэ. Биир киһи сайыҥҥы дьиэлэргэ үлэлии сылдьан хаайтаран хаалбыт диэн буолта. Онуоха бөртөлүөттэн дьиэ сарайыгар түспүтүм уонна  сарайы алдьатан киһибин онон соһон таһааран быһаабыппыт".

Оттон бу маннык ыксаллаах түгэн сыл ахсын буолар. Ордук өрүс эстэрин, булт кэмин итиэннэ ойуур баһаардарын кэмнэригэр. Онон быыһааччылар куруук үрдүк бэлэмнээх буолаллара ирдэнэр. Маныаха үөрэх быһыытынан тургутуу ыытыллара хайаан да наадалаах.