От ыйыгар Өлүөнэ күргэтин киин тирэх сыбаайаларын оҥорууга туһаныллар коффердамы таҥан бүтэриэхтэрэ

Миллимиэтиригэр тиийэ сөп түбэһиэхтээх. Манна геодезист кээмэйэ ирдэнэр. Хас биирдии тимир бу исписэлиис бэрэбиэркэтэ суох тутууга ааспат.

Роман Платонов, геодезист: «Тимир конструкциялар кэлэллэр. Олору сыһыартыыбыт. Тэбис тэҥ буолуохтаахтар. Араастаһыыта 5 миллимиэтир иһинэн буолуохтаах. Сөп буоллаҕына ыытан иһэбит. Ону таһааран сыбааркалаан иһэллэр. Истиэнэ көбүс-көнө буолуохтаах. Кыратык да сыыһа буоллаҕына көннөрөллөр». 

Билигин сүрүн үлэ кытылга барар. Бу коффердам диэн күргэ тирэҕин сыбаайалара түһэр олоҕо оҥоһуллар.

Үлэ хас да биригээдэнэнэ хайдан тэтимнээхтик барар. Икки кытылынан уопсайа 170 тахса киһи түбүгүрэрэ. Баараҕай тутуу моһуона номнуо көстүбүт. Коффердамы таҥыы 40% тиийбит.

«Өлүөнэ өрүс кытылыгар киин тирэх сыбыыйаларын оҥорорго дойдуга аан бастаан сүрүн коффердам конструкцията туһаныллар. Билигин төгүрүччү истинэлэри туруортааһын саҕаламмыт. Коффердам уопсай үрдүгэ 5 мэндиэмэннээх дьиэҕэ тэҥнэһэр», -  Мария Дмитриева, корреспондент.

Күргэ 3 улахан тирэхтээх буолар. Ол аата бу курдук 3 коффердам таҥыллыа. Исписэлиистэр этэллэринэн маннык Саха сирин тыйыс усулуобуйатыгар барсар.

Михаил Акимов, "ВИС Строй" тэрилтэ оҥорон таһаарар техническэй салаатын салайааччыта: «Биһиги өрүспүтүгэр, биһиги усулуобуйабытыгар сөп түбэһиннэрэн, тохтоло суох үлэ барарыгар анаммыт конструкция.Сылы эргиччи үлэлиэхтээхпит. Муус барыыта учуоттаан оҥоһуллубут тутуу». 

Аны ити көстөр улахан турбалар устун, коффердам оннун буллаҕына, бу курдук арматура каркаастарын түһэриэхтэрэ. Уопсайа барыта 410 иһэрдиллиэхтээх. Онтон билигин 168 оҥоһулунна. Холобур, биир сууккаҕа 4 эрэ устуука таҥыллар, олус чыымпык үлэ буолан.

«Бастакы коффердамы от ыйыгар таҥан бүтэриэхтэрэ. Итиэннэ уһуннаран илдьэн Өлүөнэ эбэ түгэҕэр түһэриэхтэрэ. Ол кэннэ сыбаайаны буурдааһын үлэтэ саҕаланыаҕа», -  Мария Дмитриева, корреспондент.

Билигин хара уу ааста эрэ өрүс түгэҕэр бөҕөргөтүү үлэтин ыытыахтара. Ол онно коффердам кэлэн түһүөҕэ.