Эдьигээн улууһа анал байыаннай дьайыы кыттыылаахтарыгар хото көмөлөһөр

Бу курдук амарах санаалаах волонтердар байыастарга анаан хомуллубут гуманитарнай көмөнү ыытаары бэлэмнииллэр. Бу көмө өрөспүүбүлүкэ хас да улууһуттан хомуллан кэлбит. Күннэй Афанасьева волонтер хамсааһыныгар киирбитэ уонтан тахса сыл буолла. Кини бэйэтин баҕатынан үс сыллааҕыта анал байыаннай дьайыы кыттыылаахтарыгар гуманитарнай көмө хомуйан ыытар буолбут. Биир санаалаахтарын түмэн, үтүө дьыала тиһигин быспакка салҕанар.

Күннэй Афанасьева, волонтёр: "Үтүө санаалаахтары түмэммин бородуукта, туттар мал-сал хомуйуутун тэрийэбин. Волонтердар элбэхтэр. Биһиги аҕыйах буоламмыт Эдьигээнтэн, Амматтан, Дьокуускайтан уонна Тулагыттан 10 кылаас үөрэнээччитэ Артем Ларионов буолан хомуйабыт".

Айталина Михайлова Эдьигээн улууһуттан анаан-минээн айаннаан кэлбит. Байыастарга ас-таҥас, балык-эт аҕалбыт. Уолаттарбыт этэҥҥэ эргиллэн кэлэллэригэр, төһө кыалларынан бэйэбит көмөбүтүн оҥоробут диэн этэр.

Айталина Михайлова, волонтёр: "Көмөлөспүппүт ыраатта. Оройуон да, норуот да куруук балыгынан, этинэн, куһунан-хааһынан көмөлөһөр. Билигин биһиги бу суол арыллыыта эмиэ балык, таҥас-сап аҕаллыбыт. Эдьигээн администрацията кэлэр ый саҥата эмиэ барыахтаахтар уолаттарга көмө илдьэ".

Бу курдук хас биирдии Саха сирин олохтооҕо бары түмсэн анал байыаннай дьайыы кыттыылаахтарыгар бэйэлэрин көмөлөрүн ууран, сэмэй кылааттарын киллэрэллэр.

Оттон бу "Якутия с тобой"  волонтердар ыстааптарыгар үлэ күөстүү оргуйар. Ыстаап бу сыл саҕаланыаҕыттан барыта сэттэ туонна гуманитарнай көмөнү ыытта. Күн бүгүн 500-чэкэ киилэ көмө хомуллан бараары бэлэм.

Анна Ефимова, "Якутия с тобой"  хапсааһын бэрэссэдээтэлэ: "500-чэкэ киилэ көмөнү хомуйдубут. Уу суола арылынна, онон бэс ыйын саҥата ыытыахпыт. Оҕолоргутугар аадырыстаах баһыылка ыытыаххытын сөп". 

Саха ыччата дойдуларын көмүскэлигэр сылдьаллара барыбытын долгутар, бары түмсэн ыраахтан да буоллар төһө кыалларынан күүс-көмө, өйөбүл буолабыт.