Үөрэххэ туттарсыыга уларыйыылар киирдилэр

Хотугулуу-Илиҥҥи федеральнай университет киин тутар хамыыһыйата үлэтин бэс ыйын 20 күнүттэн саҕалыаҕа.  Университет киин тутар хамыыһыйата Кулаковскай уулуссатыгар баар сүрүн куорпуһун 1-2 этээстэригэр дьиэлэнэр. Быйыл университекка туттарсыы быраабылаларыгар федеральнай ирдэбилинэн саҥардыы, итиэннэ докумуонары тутуу болдьохторугар уларыйыылар киириэхтэрэ. Ол курдук, тус ситиһиилэрин көмөтүнэн баалгын эбэр кыах баар буолбут, итиэннэ докумуоннары Госуслуги портал нөҥүө туттарыы хайысхата кэҥээбит.

Любовь Жиркова, ХИФУ киин тутар хамыыһыйатын исписэлииһэ: ""Поступление в вуз онлайн" диэн суперсервис нөҥүө ааспыт сылга бакалаврга уонна специалитекка эрэ туттурсыахха сөп буоллаҕына,быйыл магистратура, аспыирантура уонна орто үөрэххэ кытта докумуону биэриэххэ сөп буолла".

Биллэн турар, идэни, үөрэҕи талыы хас биирдии оҕоҕо уустук боппуруос. Сатаан быһаарыммакка сылдьааччыларга анаан университет саас ахсын аһаҕас аан күннэрин тэрийэн ыытар. Дьокуускай куорат Саха-политехническай лицейын 10 кылааһын үөрэнэччитэ Эльдар Потапов ханнык үөрэххэ киирэрин номнуо быһаарынан сылдьар.

Эльдар Потапов, Саха политехническай лицей 10-с кылааһын үөрэнээччитэ: "Үөрэх көрө кэллимс. Юридическай хайысханы сэҥээрэбин. Саха-политехническай лицейтан сылдьабын". 

Докумуоннары абитуриеннар бэйэлэрэ биитэр кинилэр бэрэстэбиитэллэрэ  кэлэн тутар хамыыһыйаҕа бириэхтэрин сөп. Биитэр Госуслуги портал  "Поступление в вуз онлайн" диэн суперсервис нөҥүө туттарыахха сөп. Былырыын чэпчэтилээх усулуобуйанан туттарсыыга кэккэ уларыйыылар киирдилэр. Чуолаан тус сыаллаах миэстэҕэ киирээччилэр, Работа в России портал нөҥүө үлэ биэрээччигэ сайаапка түһэрэр буоллулар.

Пётр Кычкин, ХИФУ киин тутар хамыыһыйатын салайааччытын солбуйааччы: "Быйыл 4 тыһыынчаттан тахса бюджет миэстэлээхпит. Бу иһигэр бакалавтр уонна специалитет миэстэтэ 3 тыһыынча курдук. Ону таһынан 3 тыһыынча курдук төлөбүрдээх үөрэх миэстэтэ баар". 

Тус сыаллаах миэстэлэргэ, маны тэҥэ байыаннай дьайыы кыттыылаахтарын оҕолоругар үөрэххэ туттарсыы бэрээдэгэ эмиэ бигэргэммитэ, кинилэр туспа куонкуруһу ааһаллар. Саха сирин саамай сүрүн үөрэҕин кыһата быйыл уонунан идэҕэ факультеттарыгар, институттарыгар саҥа устудьуоннарын күүтэр.