Ходуһалары төһө туһаналларын бэрэбиэркэлииллэр

Дьоҕус көмөлөһөөччү салгыҥҥа өрө тахсан бааһына үрдүнэн көтөр. Исписэлиистэр бастатан туран камеранан сир иэнин көрөллөр. Төһө улахан учаастак  отунан, сэтиэнэх маһынан төһө үүммүтүн көрөллөр.

Юрий Матвеев, Россельхознадзор Саха сиринээҕи салаатын иниспиэктэрэ: “Билигин көрдөххө барыта туһанылла турар курдук эбит. Сэтиэҕэ суох, талаҕынан үүммэтэх. Бу сир үчүгэйдик туһанылла сылдьар эбит. Манна элбэх сыллаах оту ыһан тураллар, онтулара көҕөрбүт”.

Бу Хаҥалас улууһугар Нөмүгү аттыгар баар учаастакка бэрбиэркэ үлэтэ ыытыллар. 15 да 20 гаалаах сир. Иэнэ улахан. Онон иниспиэктэрдэр син өр дрону көтүтэн көрдүлэр.

“Сэтиэнэҕинэн үүнэн турар сирдэр ойуур баһаарын биир сүрүн төрүөтүнэн буолаллар. Онон маннык бэрэбиэркэ ыытыллара тоҕоостоох. Тоҕоостоох биэдэмистибэ үлэһиттэрэ бүгүн көрбүт сирдэригэр кэһиини булбатылар”., - Ирена Осипова, корреспондент.

Туһааннаах бэрэбиэркэни иниспиэктэрдэр өссө 6 учаастакка ыыттылар. Оттон бу ый саҕаланыаҕыттан уопсайа 800 гектар иэннээх барыта 50 сири көрдүлэр. Ол иһигэр Мэҥэ Хаҥалас, Нам, Чурапчы, Хаҥалас улуустарыгар итиэннэ Дьокуускай куорат эргин. Манна иниспиэктэрдэр хас да кэһиини буллулар.

Дмитрий Афанасьев, Россельхознадзор Саха сиринээҕи салаатын инспиэктэрэ: “Сири бас билээччилэргэ сэрэтии ыытабыт. Сэтиэнэх уонна талах сир аҥаарын ылар буоллаҕына, бу сир туһаныллыбат эбит диэн буолар. Онон салгыы прокуратураҕа былааны таһынан бэрэбиэркэҕэ тахсаары докумуоннарын сөбүлэҥҥэ ыытабыт”.

Ойуур баһаара тахсарыгар тиэриллибиэтэх, отунан-маһынан үүммүт итиэннэ ааспыт сыллааҕы хаппыт ото ыраастамматах сирдэр улахан кутталы үөскэтэллэр. Кураанах отунан уот түргэнник тарҕанан дьон олорор сиригэр тиийиэн сөп. Ол иһин кытаанах хонтуруол барар. Билигин өрөспүүбүлүкэ үрдүнэн ойуур баһаара тахсар ордук кутталлаах кэмэ. Бу быраҕыллыбыт бааһыналар уот тахсар биир сүрүн төрүөтүнэн буолаллар. Онон сир хаһаайыттара хайаан да бас билэр учаастактарын туһаныахтаахтар, көрө-истэ сылдьыахтаахтар.