Бастыҥ бибилэтиэкэлэри чиэстээтилэр

Саха сиригэр Бибилэтиэкэ күнүн киэн далааһыннаахтык бэлиэтээтилэр. Үгэс быһыытынан бу күн Иван Крафт аатынан Ил Дархан бириэмийэтин туттардылар. Сылын аайы бу үрдүк наҕарааданы үс хайысханан арааран туттараллар.

Быйыл "Сыл бастыҥ бибилэтиэкэ" үрдүк аатын  Таатта улууһун "Туллукчаан" оҕо бибилэтиэкэтэ ылла. Бибилэтиэкэ оҕо сайдарыгар туох баар усулуобуйаны тэрийэн, хас да хайысханан үлэлии олорор. Инникитин да өссө элбэх бырайыагы олоххо киллэрэр былааннаах.

Сардаана Кычкина, Татта улууһун "Туллукчаан" оҕо бибилэтиэкэтин сэбиэдиссэйэ: "Биһиги үчүгэй бырайыагы үлэлэтэр буоламмыт ыылыбыт дии саныыбыт. Бибилэтиэкэбитигэр араас хайысхалаах бырайыактар үлэлииллэр. Ол курдук оҕо кыра сааһыттан саҕалаан итини сэргэ доруобуйаларынан хааччахтаах оҕолорго эмиэ баар".

Саха сиригэр күн бүгүн барыта 500-тэн тахса бибилэтиэкэ баар. Кинигэ дьиэтэ билиҥҥи олоҕу кытта тэҥҥэ хардылыыр. Кэм кэрдии бары ирдэбилигэр эппиэттэһэр туһуттан аныгы кэм технологияларын, саҥа сүүрээннэри киллэрэн иһэр.

"Бу Саха сирин биир бастыҥ библэтиэкэтигэр кэлэн турабыт. Күн бүгүн Нацмональнай бибилэтиэкэҕэ 200 тахса киһи үлэлиир. Сүрүн бибилэтиэкэ быйыл үбүлүөйдээх 100 сыла. Ол чэрчитинэн улахан өрөмүөн үлэтэ саҕаланна".

Ол курдук Национальнай бибилэтиэкэ 3 уонна 4 этээһэ саҥардыллыахтаах. Өрөмүөн үлэтэ номнуо саҕаламмыта, күһүн кинигэ дьиэтэ ааҕааччыларын өссө кэнээн, сырдаан, саҥардыллан көрсүөхтээх.

Александр Игнатьев, СӨ национальнай бибилэтиэкэ дириэктэрин солбуйааччы: "Үбүлүөйдээх сылбыт буолар. Онон бэлэмнэнии үлэтэ ыытыллар. Үбүлүөйбүт иннигэр барытын ситэрэн-хоторон кыраһыабай уораҕайга көрсүөхтээхпит. 3,4 этээстэр кирилиэстэрин, холларын оҥоруохтаахпыт. Оттон кэлэр сылыгар ааҕар саалалары саҥардыахпыт ".

Онон саҥа үйэ бибилэтиэкэтэ кинигэ уларсарынан муҥурдаммакка, эдэр ыччаты кинигэни таптаан харыстаан ааҕарга  итиэннэ иллэҥ кэмин туһалаахтык атаарар сайыннарар, үөрэтэр киин буолуохтаах.