Саха сиригэр ойуур баһаарын утары охсуһуу үлэтэ салҕанар

Саха сиригэр ойуурга уот турар кутталлаах кэмэ саҕаланыаҕыттан барыта 200 тахса ойуур баһаара умуруоруллунна.  Ойуур баһаарын сүрүн төрүөтэ киһи буолар. Маны таһынан куйаас күннэр саҕаланан этиҥтэн баһаардар таҕыстылар. Күн бүгүн Өрөспүүбүлүкэ үрдүнэн 5 ойуур баһаар баара бэлиэтэнэр.

Ойуур баһаара Өрөспүүбүлүкэ салалтатын тус хонтуруолугар турар. Ил Дархан Айсен Николаев ыксаллаах быһыы-майгы хамыыһыйатын ыытта. Улуустарга баһаартан сэрэхтээх буолууга,  бэлэмнэрин күүһүрдэллэрин сорудахтаата.  

Дмитрий Садовников, СӨ бырабыытылыстыбатын бэрэссэдээтэлин бастакы солбуйааччыта: «Лиэнскэй оройуонугар икки баһаар баар, Нүөрүнгүрү, Муома, Эбээн Бытантай оройуоннарыгар биирдии баһаардаахтар. 5 баһаар умайа турар. 3 баһаарын умуруора сылдьабыт, икки баһаар тохтотуллан турар. Гидромет этэринэн киин уонна арҕаа оройуоннарга бу сотору кэмҥэ тыаллаах түгэннэр үөскүүллэрэ баар».

Күнү-дьылы кэтээн көрөр сулууспа иһитиннэрэринэн бу нэдиэлэҕэ куйаас күн-дьыл олохтоноро күүтүллэр. Салгын температуурата нуорматтан 7-9 кыраадыс үрдүүрэ сабаҕаланар. Өрөспүүбүлүкэ соҕуруу оройуоннарыгар халлаан 28 кыраадыска диэри сылыйара күүтүллэр.

Саргылаана Никитина, Дьокуускайдааҕы күнү-дьылы кэтээн көрөр сулууспа күн-дьыл туругун сылыктыыр салаа салайааччыта: «Соҕуруулуу-арҕаа, арҕаа уонна Эдьигээн оройуоннарга этиҥнээх ардаҕы, күүстээх тыал сорох сиринэн тобурах да түһүөн сөп. Киин, соҕуруу уонна хотугулуу-илин оройуоннарга сылаас салгын маассата кэлэн 20-25 кыраадыска, сэрэдээ, чэппиэр 25-30 кыраадыска дылы сылыйара күүтүллэр ».

Күн бэҕэһээ зондировщик сөмөлүөт Амма, Уус Майа, Чурапчы улуустарыгар көппүтэ. Маны таһынан космическай уонна авиационнай кэтээн көрүү тохтоло суох үлэлиир.