Дьокуускайга рассада маассабай атыыта саҕаланна

Сылын ахсын тутуу ырыынага баччаларга үүнээйи ырыынагар кубулуйар. Сүүһүнэн рассада, дьэрэкээн сибэкки хото тэлгэммит. Бу барыта чааһынайдар, идэтийбит оҕуруоччуттар бүөбэйдээн үүннэрбит күөх битэмииннэрэ. Дьон кэлиитэ көхтөөх, ким сибэкки, оттон ким оҕуруот аһын рассадатын атыылаһар.

Нина Саввинова, Нам улууһун олохтооҕо: «Сибэкки, оҕуруот аһын олордобут».

Сыллата оҕуруот аһын рассадатын олунньу ыйтан саҕалаан олордон, маннык анаан-минээн атыыга таһаараллар. Былырыыҥҥытааҕар сыана ортотунан 10-15 бырыһыанынан эбилибит. Уус Алдан Бороҕонун олохтооҕо Анна Дьяконова элбэх сыллаах сибэкки олордорбун ордоробун диэн этэр.

Анна Дьяконова, Уус Алдан улууһун олохтооҕо: «Мин элбэх сыллааҕы көрөөччүм. Кыһын куоракка кыстыыбын. Кинилэр уруккаттан атыылыыллар, мин куруутун мантан ылааччым».

Оҕуруот аһа ортотунан 50-80 солкуобайга солкуобайтан ыла саҕаланар. Оҕурсу, помидор, сүбүөкүлэ, хаппыыста, биэрэс тарҕаммыт суортара хас эрээт аайы кэчигирэһэллэр. Холобура, бэйэтэ ууһаан үүнэр кабачок сыаната биир мөһөөхтөн тахса. Оттон сибэкки рассадата көрүҥүттэн көрөн ортотунан 70 солкуобайтан 300 диэри сыанаҕа атыылынар. Петуниялар суортарыттан көрөн сыаната араастаһар, эриэккэс сибэккилэр сыаналара эмиэ добуоччу. Клубника, саад дьэдьэнэ эмиэ элбэх. Сыаната 350 солкуобайтан саҕаланар. Дьэрэкээн өҥнөөх сибэккилэр уйгу сайыммыт кэрэтин көрдөрөрдүү үүнэн силигилээн туралларын көрүөххэ үчүгэйэ.

Виталий Чахов, Дьокуускай олохтооҕо: «Урут клубника олордор этибит, быйыл дьэдьэҥҥэ көстүбүт, баҕар ордук буолуо диэммит».

Сүрэхтээх дьон бүөбэйдээн, буору, сиэмэни кытта эрдэттэн тустан, өлгөм үүнүүнү ылан атыыга таһааран, дохуот аахсар. Рассада дьаарбаҥкатыгар сыллата саҥа, сонун үүнээйилэр киирэн иһэллэр. Урукку сылларга отонноох мас көрүнэ аҕыйах эбит буоллаҕына, билигин араас маһы, үүнээйини атыылыыллар.

Раиса Кононенко, атыыһыт: «В последнее время занимаемся только многолетними цветами и саженцами: смородина черная, красная, малина, декоративные кустарники, сирень».

Биллэн турар, хас биирдии үүнээйи элбэх көрүүттэн, сыралаах үлэттэн тахсар. Кини оҕолуу кэриэтэ сыһыаны эрэйэр, онон болҕомто, сүрэхтээх буолуу ирдэнэр. Аны сири кытта бодьуустаһар дьоҥҥо- таба талбытын олордор, бүөбэйдиир түбүгэ хаалар.