Улуу тренер аатын үйэтитии

Тыһыынчанан килэмиэтири уҥуордаан кэлбит тиит мастар олордорго бэлэм тураллар. Улуу тренерга анаммыт мастары олордо, биллэн турар, биир бастакынан кини иитиллээччилэрэ, олимпиецтарбыт кэлбиттэр. Тустаах тэрээһин Дмитрий Петрович Коркин аатын өссө ааттатарга итиэннэ кэлэр кэнэҕэски ыччакка кини туһунан өйдөбүлү хаалларарга эмиэ биир дьоһун хардыы диэн бэлиэтииллэр.

Павел Пинигин, Д.П. Коркин иитиллээччитэ, Олимпийскай чөмпүйүөн: "Көлүөнэ ситимэ, кэм ситимэ уонна сири кытта ситим барыта сыстыһан биир история буолан салҕанан бара турар. Ону биһиги эдэр ыччаттарбыт, чуолаан тустууктар, ону билиэхтээхтэр, сыаналыахтаахтар. Инникитин да итинник салгыы туруохтара диэн эрэнэбин".

Александр Иванов, Д.П. Коркин иитиллээччитэ, Олимпийскай оонньуулар призёра: "Олус үчүгэй тэрээһин. Д.П. Коркины үйэтитии кэнники кэмнэргэ күүскэ барар. Маннык улуу киһини аҕыйах сыл иһигэр хайдах да кыаллыбат. Биһиги тыыннаахпыт тухары уонна биһиги ыччаттарбыт баалларын тухары үйэтитиэхтэрэ диэн эрэнэбин".

Бу титириктэр улуу тренер Дмитрий Петрович Коркин Булуҥ улууһун Бороҕон нэһилиэгэр үөрэммит оскуолатын олбуоруттан кэллилэр. Кини иитиллээччитэ спорт түмэлин дириэктэрэ Михаил Егорович Друзьянов бу дьыаланы иилээбит-көҕүлээбит. Маныаха бу мас олордуутунан эрэ муҥурдаммакка Булуҥ улууһугар экспедиция тэрийэн бара сылдьыбыт.

Михаил Друзьянов, Д.П. Коркин иитиллээччитэ, аахсыйа көҕүлээччитэ: "Мин 5 сыллааҕыта экспедиция тэрийбитим, Д.П. Коркин олорбут улууһугар Кэрэски диэн кыра учаастакка үөрэммит оскуолатыттан биир паартаны аҕалбытым.Итиэннэ онтубун Саха түмэлигэр туттарбытым".

Уонна бу сылдьан кини Дмитрий Петрович үөрэммит оскуолата турбут сиригэр үүнэн эрэр титириктэри Чурапчыга баар түмэлигэр аҕалтаран олордубут. Аны билигин өссө иккини бу “Триумф" уораҕайыгар олортулар. Мантан салгыы бу үтүө үгэскэ кубулуйоҕа. Сыл ахсын ыам ыйын 23 күнүгэр, аан дойдуга тустуу күнүнэн бу аллеяҕа тустууктар мас олордор буолуохтара.