Өрөспүүбүлүкэ болуоссатыгар Добун оһуохай

Сомоҕолоһуу оһуохайа. Норуот култууратын чыпчаала буолбут, саха норуотун төгүрүччү үнкүүтэ Россияҕа култуура нэһилиэстибэ быһыытынан сыаналаммыта. Икки сыллааҕыта Ил Дархан Айсен Николаев ыйааҕынан ыам ыйын 25 күнүгэр саха дьоно Оһуохай күнүн бэлиэтиир.

Оһуохай саха норуотун төрүт култууратын, сиэрин-туомун илдьэ сылдьар төрүт үнкүүбүт буолар.   Улуус, түөлбэ аайы оһуохай араастаһар. Төрүт үнкүүнү үйэлэртэн илдьэ кэлэн кэлэр кэнчээригэ тиэрдэр ытык иэспит. 

Сергей Местников, СӨ Бырабыыталыстыба бэрэссэдээтэлин солбуйааччы: “Биһиги норуоппут сүдү баайа, үйэлэри уҥуордаан кэлбит култуурабыт сүдү көрүҥүн үүнэр көлүөнэҕэ тириэрдэр соруктаахпыт. Ол курдук ыйаахха олоҕуран кэнники кэмнэргэ оҕолорго, ыччаттарга, улахан дьоҥҥо араас таһымнаах күрэхтэри ыыттыбыт”.

Дьокуускай куорат Өрөспүүбүлүкэ болуоссатыгар саха дьоно-сэргэтэ, эдэр ыччат бары биир санаанан түмсэн оһуохайы оройуттан тутар. Саха норуотун биир санааҕа түмэр оһуохай,  дьону илии илииттэн тутуһуннаран, биир тэтимҥэ, биир тыынна  киллэрдэ.

Бу бэлиэ күҥҥэ өрөспүүбүлүкэтээҕи эдэр ыччат күрэҕин түмүгүн таһаардылар. Быйыл барыта 2,5 тыһыынчаттан тахса киһи кыттыыны ылла.  Мэҥэ Хаҥалас улууһуттан сылдьар Денис Оконешников бастыҥ оһуохай этээччи, лауреат үрдүк аатын тутан үөрүүтэ муҥура суох. 

Денис Оконешников, "Куйаар далай түһүлгэ" күрэх лауреата: “Оһуохай миэхэ элбэҕи биэрдэҕэ дии. Сахам норуотун үгүс үйэлээх үгэһэ, итэҕэлгэ сыһыана, сиэрэ-туома ити эйгэҕэ элбэҕи биэрдэ оһуохай”.  

Сомоҕолоһуу оһуохайын саргылаах түһүлгэтэ киин куоракка эрэ буолбакка, бүтүн Саха сирин хас биирдии улууһугар дьону-сэргэни түмтэ.