Дьокуускайга эһиил тупсаран оҥоһуллуохтаах уопсастыбыннай территориярга куоластааһына салҕанар

Муус устар ыйтан саҕалаан үүнэр сылга тупсарыллыахтаах общественнай сирдэри быһаарар бүтүн дойдутааҕы онлайн-куоластааһын бара турар. Рейтиннээх куоластааһын сүрүн сыалынан общественнай туоналары тэрийиигэ уонна тупсарыыга нэһилиэнньэни  кытыннарыы буолар. Быйыл Саха сирин олохтоохторо уопсайа 34 муниципальнай тэриллиигэ, 74 эбийиэги талан куоластарын биэрэллэр.

Семён Сергеев, Дьокуускай куорат кылаабынай архитектора: «Быйыл Дьокуускай куоракка 8 бырайыак киирэн турар куоластааһыҥҥа. Билиҥҥи туругунан 21 тыһ. куолас хомулунна. Уопсайынан нэһилиэнньэлээх пууннарга барыларыгар былаан туруоруллар. Биһи 34 тыһ. куолаһы хомуйуохтаахпыт».

Билиҥҥи туругунан 8 эбийиэктэн аэропорт оройуонугар баар Юрий Гагарин аатынан сквер элбэх куолаһы ылан кыайан иһэр, салгыы университет эргин Теплай күөл кытыла уонна 3 миэстэҕэ Аҕа дойду сэриитигэр Ржев куорат иһин охтубут буойуттар сквердэрэ иһэллэр. Табыгастаах куорат эйгэтин оҥоруу федеральнай бырайыак дойду үрдүнэн 2019 сыллаахтан олоххо киирбитэ. Бу кэм иһигэр улуустарга уонна киин куоракка общественнай сирдэр оҥоһулан тупсарыы үлэтэ барар. Сайсары күөлүн кытыла 2 сыллааҕыта кыайан оҥоһуллан билигин киин куорат бастыҥ сынньанар сирдэрин иһигэр киирсэр. 

Куоластааһыҥҥа Гослуслуги портал нөҥүө киирэн Формирование кофмортной городской среды киирэн олорор нэһилиэккин, куораккын талан испииһэккэ киирбит общественнай сирдэри талыаххын сөп. Бүгүҥҥү күҥҥэ өрөспүүбүлүкэ үрдүнэн 53 тыһыынчатан тахса киһи куолаһын биэрбит.

Семён Сергеев, Дьокуускай куорат кылаабынай архитектора: «Саха сиригэр улуустарынан куоластааһын эмиэ бара турар. Саха сиригэр 85 тыһ. куолас хомуйуохтаахпыт».

Быйылгыттан кыайыылааҕынан биир эбийиэк буолбакка, 3 кыайыылаах талыллан үбүлээһин көрүллүөҕэ.