Тыа хаһаайыстыбатын салаатыгар көрдөрүү тупсар

Хас сарсыардаа аайы 300 тыһыынча сымыыт хомуллар уонна дьаарыстанар. 6 сыах сымыыта автоматика көмөтүнэн бу конвеер устун кэлэр. Билигин кууруссалар саамай муҥутаан сымыыттыыр кэмнэрэ. Ол эрэн хаачыстыбаны бэрэбиэркэлээһини хайа да аныгы тиэхиньикэ солбуйбат.

Оттон дьаарыстааһыҥҥа саҥа оборуудабанньа илиинэн үлэни чэпчэтэр. Оҥорон таһаарыы кээмэйэ улаатар, мыанаха ааспыт сылга турбут сымыыты сааһылаан угар тэрил көмө буолар.    

Любовь Яковлева, сымыыт дьаарыстааччы: «Мин отборнай сымыыт хомуйа турабын. Икки отборка баар уонна икки 3 линия баар. Арыый чэпчээтэ».

Дьокуускайдааҕы көтөр фабриката күн бүгүн өрөспүүбүлүкэ үгүс өттүн хааччыйан олорор. Кэнники 5 сылга оҥорон таһаарыы көрдөрүүтэ 40 мөлүйүөн сымыытынан элбээтэ, ол эбэтэр 45 бырыһыан. Арассыыйа үрдүнэн уонча бастыҥ көтөр фабриката баар. Балар көрдөрүүлэрин ситиһэргэ билигин технологияны баһылааһыҥҥа үлэ барар. Маныаха анал үөрэхтээх исписэлиистэр төһүү буолаллар. Людмила Попова икки сыллааҕыта тыа хаһаайыстыбатын техникумун бүтэрбитэ. Билигин кини сыах салайааччыта.

Людмила Попова, Дьокуускайдааҕы көтөр фабрикатын сымыыты дьаарыстыыр сыах салайааччыта: «Каждый день мы вырабатываем более 300 тысяч яиц. У нас 6 производственных цехов. В день получается около 900 коробок. Работаю 2 года, начинала сортировщицей, потом бригадиром. Сейчас я руковожу производством цеха».

Саха сирэ бу көрүҥ аһынан бэйэтин 60 бырыһыан хааччынан олорор.

Саха сирэ тыа хаһаайыстыбатын салаатыгар оҥорон таһаарыы кэнники сылларга тупсар. Ол курдук бары салааҕа баалабай көрдөрүү улаатар. Оттон олохтоох оҥорон таһаарыы кээмэйин үрдэтии, бэйэ хааччыныы өрөспүүбүлүкэ политикатын тутаах соруга. Маныаха быйыл ыһыы иэнэ уонна үүт соҕотуопката улаатта.

Николай Афанасьев, СӨ тыа хаһаайыстыбатын миниистирин собуйааччы: «Иэннэри кэҥэтии үлэтэ барда, кыратык да буоллар. Сыал-сорук күүскэ турар. Бэйэбит аспытынан хааччыйыахтаахпыт. Ол быһыытынан ыһыыны кэҥэтэр сыал турда. Ынахпыт 60% төрөөн турар. Былырыыҥҥытааҕар баалабай үүт ыама үрдүк – 220 тыһ. туонна баалабай үүт ыанна».

Быйыл сайын барыта 47 үүт соҕотуопкалааччы үрүҥ илгэни оҥорон таһаарыа. Онон тыа хаһаайыстыбатыгар саамай эппиэтинэстээх кэм саҕаланна.