Саха сиригэр Ырыа күнүн киэн далааһыннаахтык бэлиэтээтилэр

Бу күн Өрөспүүбүлүкэ олохтоохторо ырыа кутуллар дорҕоонугар уйдаран Ырыа күнүн үрдүк таһымнаахтык бэлиэтээтилэр.

Дьоро күн Дьокуускай куоракка ырыа түһүлгэтигэр ансаамбыллар, саха эстрадатын артыыстара, айар бөлөхтөр дьоҥҥо-сэргэҕэ бырааһынньыктааҕы кэнсиэр бэлэхтээтилэр.

Лина Акимова, СӨ үтүөлээх артыыһа: «Ырыа күнэ бэлиэтэнэрэ олус үчүгэй. Статуһа Сахабыт сиригэр үрдүүр. Уонна элбэх үчүгэй таһымнаах ырыалар элбииллэр».

2022 сыллаахха Ил Дархан Айсен Николаев ыйааҕынан ыам ыйын 21 күнүгэр Саха сиригэр Ырыа күнүн бэлиэтиибит. Хас биирдии улууска, нэһилиэккэ, ылбаҕай ырыа дьиэрэйдэ. Үгэс быһыытынан ырыа эйгэтигэр Ил Дархан бириэмийэтин туттараллар.

Афанасий Ноев, СӨ култуура уонна духуобунай сайдыы миниистирэ: «Дойдубутугар Кыайыы 80 сылыгар анаан уонна патриотическэй хайысхаҕа бириэмийэ туттарыллар. Норуот сөбүлүүр, ылынар хайысхатынан номинация туттарыллар».

"Норуот таптыыр ырыата" номинацияны -  ырыа айааччы, биллэр мелодист Иван Иванов ылла. Бу бириэмиэйэ тус бэйэбэр улахан суолталаах, мантан кынаттанан салгыы өссө саҥа ырыалары айыам-тутуом диэн этэр. 

Иван Иванов, мелодист: «Инникитин айарбар кыах биэрэр. Бүөтүр Тобуруокап хоһоонугар ырыа суруйбутум 2020 сыллаахха. Ол ырыаны Степан Васильев көҕүлээн, куонкуруска биэрбиппит».

Күн бүгүн Өрөспүүбүлүкэ үрдүнэн 1,5 тыһыынча ансаамбыл баар. Саха сирин ырыаһыттара, ансаамбыллар араас таһымнаах куонкурустарга ситиһилээхтик кытталлар. Арассыыйаҕа эрэ буолбакка, аан дойдуга тиийэ биллэллэр, элбэх киһи биһирэбилин ылаллар.