Саха сиригэр сааскы кустааһын кэмигэр 53 кэһиини буллулар

Булт инспиэктэрдэрэ сааскы кус кэмин бүтэһик күнүгэр күүһурдүллүбүт эрэһииминэн үлэлээтилэр. Инчэҕэй атахтарынан хаама сылдьан, сааһыттары бэрэбиэркэлээтилэр. Сүрүн болҕомто докуомуоҥҥа уонна электрическэй кус мэҥиэтигэр ууруллар. Бастакы булчуттар, ымпыктаах бэрэбиэркэ түмүгүнэн, хайа да өттүнэн барыта сөрү-сөп, туох да кэһиитэ суохтара билиннэ.

Геннадий Андреев, булчут: «Барыта бэрээдэк. Оннук эрэ билигин кустууллар. Духовой маноктаахпыт. Саҥардар суох, наадыйбаппыт».

Булчуттар бары билэллэр, саҥардар, электрическай мэҥиэлээх бултааһын - бу сокуону кэһии буолар. Бүгүҥҥү оперативнай тэрээһиҥҥэ инспиэктэрдэр бу ыстатыйанан сааһыттары туттуллар. Кинилэргэ административнай боротокуол оҥоһулунна. Маныаха саалара былдьанна. Уопсайынан быйылгы сааскы куска инспиэктэрдэр үгүс кэһиини буллулар.

Иннокентий Семёнов, Биологическай ресурсалар, ураты харыстанар айылҕалаах сирдэр уонна аан айылгылар дирекциятын салайааччытын солбуйааччы: «50-чэ боротокуол, онтон 20-тэн тахса электрическэй манок диэн оҥоһулунна. Сүрүн улахан кэһии буолар, булт көҥүлүн былдьыырга дылы буолар. Боротокуол толоруллуннаҕа сааларын ылабыт».

Манна даҕаттан эттэххэ, бу кэһиилэртэн 20-тэ  саҥарар электрическэй мэҥиэни уонна көҥүлэ суох сааны туттуу буолар. 10 сааһыт бултуур лицензиялара суохтара биллибитэ. 3 киһи ураты харыстанар сиргэ кустаабыта тутулунна. Уопсайа риэйдэбэй тэрээһиннэр түмүктэринэн 23 саа уонна 9 электрическай мэҥиэ булчуттартан былдьанна.

Бүгүҥҥү оперативнай тэрээһиҥҥэ инспиэктэрдэр дрон көмөтүн туһанныллар. Хас эмэ км. сири үөһэттэн кэтээн көрдүлэр.

Дмитрий Николаев, Биологическай ресурсалар, ураты харыстанар айылҕалаах сирдэр уонна аан айылгылар дирекциятын булт салалтатын кылаабынай исписэлииһэ: «Сатыы сылдьан көрөрдөөҕөр 1-2 км. көрөн кэбиһэбит. Холобур, бу сылгылар кытаран көстөллөр. Дурда ханна баарын көрөбүт».

Оттон маннык оперативнай тэрээһин тохтообот. Инспиэктэрдэр хас эмэ бөлөҕүнэн сылдьан, түүннэри күнүстэри риэйдэлэри ыыта туруохтара.