Өрөспүүбүлүкэ үрдүнэн оҕолору лааҕырдарга суруйтарыы саҕаланна

Дьокуускайдааҕы 2 нүөмэрдээх орто оскуола Спутник диэн лааҕыра куорат бөдөҥ лааҕырдарыттан биирдэстэрэ буолар. Сотору кэминэн саҥа үлэҕэ киирэр куорпустардаах лааҕыр аанын тэлэччи аһыаҕа, онон бэлэмнэнии үлэтэ күргүөмнэхтик саҕаланна. Манна эрдэ 100-кэ оҕо сайыҥҥы сынньалаҥын туһалаахтык атаарар эбит буоллаҕына, быйылгыттан бу сыыппара бүтүн 3 төгүл эбилиннэ.

Василий Владимиров, Дьокуускайдааҕы 2№-дээх политехническай оскуола дириэктэрэ: «Былырыын саҥа корпустар киирэннэр 300 миэстэ баар буолла. Быйыл 4 сезон былааннанар. Бастакы сезон бэс ыйын 14 чыыһылатытан саҕалыыбыт уонна атырдьах ыйын ортотугар дылы».

Билигин лааҕыр саҥа куорпустарыгар өрөмүөн үлэтэ ситиэхтээх. Ол курдук баһаарынай водоем оҥоһуутун, итиэннэ тула өттүн территориятын аспааллааһын үлэлэрэ хаалан тураллар. Бэс ыйын 10-гар диэри үлэ үмүрүйэн барыта бэлэм буолуохтаах. Саха сирин үрдүнэн быйыл уопсайа 560 лааҕыр үлэлиирэ күүтүллэр. Уопсайа 57 тыһыынча оҕону хабар сорук турар.

Варвара Васильева, "Бэс чагда" оҕо сынньалаҥын уонна чэбдигирдэр киинин салайааччы: «Бастакы уочаратынан хабыллаллар анал дьайыы оҕолоро, онтон өссө элбэх оҕолоохтоохтор, кыамматтар уонна тулаайах оҕолор».

Оҕолору лааҕырдарга суруйтарыы ыам ыйын 15 күнүттэн Госуслуги портал нөҥүө саҕаламмыта уонна сайын устата салҕаныаҕа. Лааҕырдар үлэлэрэ бэс ыйын саҥатыттан саҕаланан, сменэлэринэн ыытыллыаҕа. Маныаха сайабылыанньалары портал нөҥүө, итиэннэ лааҕырдарга бэйэлэригэр кэлэн эмиэ биэрэллэр. Сайабыланньа биэрэр бастакы күн Бэс чагда лааҕырга суруттарааччы элбэх.

Оҕолор өрөспүүбүлүкэ иһигэр эрэ буолбакка, тустаах бэдэрээлинэй бырагыраамаларынан бөдөҥ оҕо сынньалаҥ кииннэригэр, лааҕырдарыгар сынньанар кыахтаахтар. Дойду үрдүнэн биир ситимнээх оҕону иитиигэ 12 модуллях бырагыраамата тахсан турар, манна эрэгийиэннээҕи хайысха эмиэ киирэр,ону тэҥэ баһаатайдары эмиэ тустаах бырагыраама ылыллан олоххо киирэр.