Өлүөнэ өрүскэ муус ситэ ыраастана илигинэн бастакы паром сырыытын 22-23 чыыһылаларга көһөрдүлэр

Дьокуускай 204 түөлбэтигэр кэлии-барыы, дьон сыбыытаан олорор. Салгын олбохтоох суудуналар тохтоло суох киин куорат кытылыттан, Аллараа Бэстээххэ нэһилиэнньэни тириэрдэллэр. Күн бүгүн бу көрүҥ суудуналарга сыана 3000 солкуобайга тэҥэһэр.

Борис Строев, "Ленаводсервис" тэрилтэ салайааччыта: «Улахан муус ааста. Ол кэмигэр 3 күн 5 тыһыынчаҕа таспыппыт. Билигин муус кыралаан барар, сыанабытын түһэрдибит. Бу күннэргэ үлэлээн бүтэрбит буолуо».

Онон билигин салгын олбохтоох суудуналар бүтэһик күннэрин күүһүрдүллүбүт эрэһииминэн үлэлииллэр. Ыам ыйын 23 күнүттэн тохтууллара былааннанар.

Екатерина Скрябина дойдутугар бараары халыҥ уочаракка турар. Суһаллык өрүһү туораары салгын олбохтор ыстаансыйатыгар кэллим, киһи буолунай диэн санаатын үллэстэр.

Екатерина Скрябина, Чурапчы улууһун олохтооҕо: «Чурапчылаан эрэбин. Кыһалҕа буолан манан сылдьабыт. Паром түргэнник сүүрэн саҕалыыра буолуо диэн баҕа санаалаахпыт».

Чахчы, дьэ аҕыйах хонугунан паромнар сырыылара саҕалыаныа. Билигин бу хайысхаҕа, Даркылаахха бэлэмнэнии үлэтэ ыытыллар. Күн бүгүҥҥүттэн улахан кыамталаах тиэхиникэ кытылы оҥорон саҕалыа, светофордары, шлагбаумнары туруортаан  саҕалыахтара.

Семён Коркин, СӨ тыраанспар уонна суол хаһаайыстыбатын министиэристибэтин миниистирин солбуйааччы: «Бу күннэргэ паром сырыытыгар бэлэмнэнии үлэтэ бара турар. Бэрэбиэркэлиир хамыыһыйалар үлэлии сылдьаллар».

Манна даҕатан эттэххэ, күн-дьыл туругуттан көрөн, бастакы паромнар сырыыларын саҕалыахтара. Уопсайа Дьокуускай-Аллара Бэстээх хайысхатынан 14 паром тимир көлөлөрү 30 мүнүүтэ буола - буола таһыаҕа. Тарыып чааһыгар киирдэххэ, Саха сирин сыана быһыытын кэмитиэтэ иһитиннэрэринэн быйылгы навигацияҕа сыана маннык буолара күүтүллэр. Кыра массыыналар 1150 солкуобайтан саҕалаан 1400 диэри. Автобустар 2500 саҕалаан - 4400 диэри. Мотоцикллар тарыыптара 300 тэҥнэһиэ.