"Мой бизнес" киин анал байыаннай дьайыы кыттыылаахтарыгар анал үөрэҕи саҕалаата

Анал байыаннай дьайыы кыттыылааҕа Аркадий Пудов маннык анал үөрэх саҕаланан эрэрин истээт, кыттарга санаммыт. Кини бэйэ дьыалатын тэринэн, үлэлэтиэн баҕарбыта ыраатта. Номнуо бастакы хардыылар бааллар.  Бу үөрэххэ элбэҕи, саҥаны билиэм диэн үөрэ кэпсиир.

Аркадий Пудов, анал байыаннай дьайыы кыттыылааҕа: «Хас биирдии киһи баҕа санаалаах. Ол баҕа санаата туоларыгар бу төһүү күүс буолара буолуо дии саныыбын. Бу үөрэх кэмигэр санааларбын чочуйан, ханныгын таларбын ол эмиэ боппуруос».

"Мин дьыалам" диэн үөрэх, нэдиэлэ устата ыытыллыаҕа. Бу бырайыак анал байыаннай дьайыы кыттыылаахтара уонна кинилэр дьиэ кэргэттэрэ бэйэ дьыалаларын тэрийэн, урбаан эйгэтигэр бастакы хардыыларыгар улахан көмө буолуоҕа диэн тэрийээччилэр эрэнэллэр.

Зоя Седалищева, "Мой бизнес" киин салайааччыта: «Сыалбыт сорукпут – кинилэри бэйэлэрэ урбаанынан дьарыктаналларыгар бастакы хардыыны оҥороллоругар биһиги билии биэриэхтээхпит. Манна холобура, бэйэ-бэйэлэрин кытта билсиһэннэр, билигин үлэлии сылдьар урбаанньыттары кытта билсиһэн бэйэлэрэ практическэй уопут ыланнар кэлиҥҥи сайдыыларыгар туһаны аҕалыахтаах диэн эрэнэбит».

Анал үөрэх ыам ыйын 23 күнүгэр диэри ыытыллыаҕа. Бу кэм иһигэр кыттааччылар бэйэлэрин бырайыактарын ситэрэн, экспертэргэ көмүскүөхтэрэ. Үөрэх кэннэ, бу бырайыакка кыттар тэрилтэлэр хас биирди кыттааччыны бэйэтигэр сыһыаран күүс-көмө, өйөбүл буолуоҕа. 

Пётр Максимов, Саха сиригэр урбаан сайдыытын пуондатын салайааччыта: «Хас биирдии кыайыылааҕы шефство диэн курдук ылыахпыт. Кинилэри көрөн-истэн, хайдах сайдалларын. 2 мөл. дылы саҥа саҕалааччы урбаанньыттарбытыгар көмөлөһүөхпүт. Онтон атахтарыгар турбут үлэлии сылдьар урбаанньыттарга анал дьайыы кыттыылаахтарыгар, дьиэ кэргэннэригэр 5 мөл. дылы биэриэхпит. Быраһыан ставката 1% сыллааҕыта буолуо, онтон атахха турбуттарга 5%».

Үөрэх таһынан, кыттааччылар Дьокуускай куоракка баар бөдөҥ тэрилтэлэригэр сылдьан, үлэлэрин кытта билсэн сүбэ-ама ылыахтара, маны таһынан араас, туһалаах маастар-кылаастарга сылдьан, уопуттаах урбаанньыттары кытта билсэн, билиилэрин хаҥатыахтара, таһымнарын үрдэтиэхтэрэ.