Ыам ыйын 18 күнүгэр сыллата Ньургуһун күнэ бэлиэтэнэр

Ньургуһуну үүннэрии, тарҕатыы кистэлэҥин арыйыы. Ботаническай сад учуонайдара уһун кэмнээх чинчийиилэрин түмүгүн инникитин үүнээйи дизайнерын идэтин баһылыахтаах устудьуоннарга итиэннэ баҕалаах дьоҥҥо үллэстэллэр. Бу сиэмэнэн буорга анньыллыбыт ньургуһуннар 3 сылыгар  быйыл  сибэккилээбиттэр.

Варвара Семенова, криолитозона биологическай кыһалҕаларын институтун ботаническай саадын билим үлэһитэ: «Айылҕаҕа баарын уонна култуураҕа кэтээн көрөбүт. Сиэмэнэн ыһан уонна силиһинэн олордооһун хайдах кини үүнэрин. Хайдах элбэтиэххэ сөбүн уонна хайдах харыстыахха сөбүн».

Чинчийии көрдөрбүтүнэн түөрэн олордуу Саха сирин ньургуһунугар барсыбатын кэлбит ыалдьыттарга кэпсээтилэр. Тоҕо диэтэр биир сүрүн силистээх, оннук үүнээйи көһөрүүнү тулуйбат. Биһиги өрөспүүбүлүкэбитигэр ньургуһун икки көрүҥэ кыһыл кинигэҕэ киирэр. Онон тарҕатыыны үөрэтии тоҕоостоох.

Дьэ бу кэми мүччү туппакка, сиэмэтин хомуйан ыллахха аны 3 сылынан ньургуһун сибэкки бэлэхтиэ.  Учуонайдар Алдан улууһуттан аҕалыллыбыт сиэмэ үүнүүтүн учуонадайдар кэтииллэр. Туруга үчүгэй, ол аата силиһин күүскэ таппыт. Бу үүнээйи улахан талымаһа суох, олордорго судургу, сүрүнэ буорун табыахха наада.

Дария Андросова, криолитозона биологическай кыһалҕаларын институтун ботаническай саадын билим үлэһитэ: «Кини буоллаҕына хонуу куйаар үүнээйитэ, курааны  тулуйар, олорор сирэ сымнаҕас соҕус буолуохтаах, кумах кутуллар уонна перегной».

Ньургуһун күнэ сыллата араас хабааннаахтык бэлиэтэнэр. бу сырыыга Ботаническай садка ыытылынна. Сэдэх үүнээйини тарҕатыыга, харыстааһыҥҥа болҕомто уурулунна. Кэрэ сибэккини тэнитэр баҕалаахтар түмүстүлэр.

Мария Никулина: «Саталтан кэллим, чааһынай дьиэлээхпин. Миэхэ эмиэ ньургуһуннар үүнэллэр, мин олбуорбар маннык үүнэн турар. Быйыл аҕыйах үүннэ. Атын сылларга хаамар сир суох буолааччы».

Итиэннэ саамай тулуурдаах, туохтан да чаҕыйбат кэрэ ньургуһуҥҥа сүгүрүйүү быһыытынан ботаническай сад сирин ыраастааһынан тэрээһин түмүктэннэ. Кылгас кэмҥэ тыыллар ньургуһун уһун унньуктаах кыһын кэннэ дьон -сэргэ санаатын көтөҕөр, саҥаҕа, үрдүккэ кынаттыыр.