Аан дойдутааҕы түмэл күнүн чэрчитинэн Саха сиригэр мусуой нэдиэлэтэ саҕаланна

Сэрии кэминээҕи ырыалар, кыайыы оһуохайа. Емельян Ярославскай аатынан саха түмэлигэр быйыл үгэскэ кубулуйбут бүтүн Арассыыйатааҕы түмэлгэ түүн аахсыйа сүрүн тэрээһинэ аһаҕас халлаан анныгар саҕаланна. Музей тэлгэһэтигэр 1945 сыл бастакы эйэлээх сайын диэн историческэй дьүһүйүүнү көрдөрдүлэр. Саха сирин оскуолаларын 1978 сыллаахха бүтэрбиттэр араас улуустартан түмсэн анаан-минээн бу тэрээһиҥҥэ кытта кэлбиттэр. 

Тупсууна Алгыстаах, Ньурба куорат олохтооҕо: «Тэрээһиҥҥэ оҥостон кэллибит. Былыргы үҥкүүлэри үҥкүүлүүрбүтүн сөбүлүүбүт. Маннык тэрээһиннэр ыытыллаллара биһи историябытын оҕолор умнубаттарыгар наадалаах».

Оттон үҥкүүттэн-битииттэн тэйэн саха балаҕанын диэки чугаһаатахха тимири уһаарыы тыаһа иһиллэр.

Хас да уус тэҥинэн кэлбит дьоҥҥо тимири уһаарыы кистэлэҥнэрин кэпсииллэр. Баҕалаахтар тутан-хабан да көрүөхтэрин сөп.

Александр Терентьев, Саха сирин тимир уустарын түмсүүтүн толорооччу дириэктэрэ: «Мусуой күнүгэр маастар-кылаас көрдөрө сылдьабыт. Сыл аайы ыытыллар, быйыл 4 сылбытын кыттабыт».

Аһаҕас халлаан анныгар бырагыраама бүтэн, аны ыалдьыттары түмэлгэ экскурсияҕа ыҥыраллар. Быйыл Түмэлгэ түүн бүтүн арассыыйатааҕы аахсыйа саха түмэлигэр тиэмэтэ Бастыҥнар. Дьоруойдар диэн. Бу Улуу Кыайыы 80 сылыгар туһуланна. Хас биирдии этээскэ фронтовиктарга, дьоруойдарга анаммыт экспозициялар тустарынан үлэһиттэр сиһилии кэпсииллэр. 

Холобура бу Сэбиэскэй сойуус Дьоруойа, снайпер, саха бастыҥ буойуна Федор Охлопковка туһуламмыт экспозиция. Маннык курдук сахалартан бастакы сэбиэскэй сойуус дьоруойа Федор Попов, сэрии хонуутугар 5 уолун сүтэрбит ийэ Февронья Малгина, АЛСИБ салгын трассатын туһунан экспозициялары мустубут дьон сиһилии биллилэр-көрдүлэр.

Николай Бугаев, Саха түмэлин дириэктэрэ: «Ыам ыйын 23 күнүгэр дылы манна элбэх тэрээһиннэри ыытабыт. Ыам ыйын 22 күнүгэр “Сайылыкка киирии” диэн улахан кэнсиэртээх бырагыраама ыытыахтаахпыт. Куорат олохтоохторун, ыалдьыттарын кэлэн көрөргүтүгэр ыҥырабыт».

Онон түмэл нэдиэлэтэ саҥа саҕаланна. Олохтохтор бу күннэр устата куорат түмэллэригэр араас тэрээһиннэргэ сылдьыахтарын сөп.