Аан дойдутааҕы түмэл күнүгэр Михаил Габышев аатынан бириэмийэни туттарыы буолла

Бу күн саамай долгутуулаах, күүтүүлээх бастыҥ түмэл үлэһит аатын Татьяна Старостина ылла. Кини култуура эйгэтигэр, түмэлгэ 30-тан тахса сыл үлэлээн кэллэ. Билигин да үлэ үөһүгэр сылдьар. Бу бэйэм эрэ наҕараадам буолбакка, хамаанда үлэтин түмүгэ диэн үөрэ кэпсиир.

Татьяна Старостина, Ем. Ярославскай аатынан саха түмэлин үлэһитэ: «Наһаа интириэһинэй, ол иһин 30 сыл үлэлиир буоллаҕым. Мусуойга киһи күн аайы саҥаны билэр. Араас мал баар, кинилэр историялара, кимиэхэ, туохха сыһыаннаахтара, хаһан булуллубуттара барыта наһаа интириэһинэй».

Михаил Габышев аатынан бириэмийэни сылын аайы 3 номинацяҕа арааран туттараллар. Быйыл Сыл бастыҥ түмэлэ -  "Арассыыйа - Мин историям" историческэй паарката буолла. Былырыыҥҥы сыл түмүгүнэн түмэлгэ 127 тыһыынча киһи сылдьыбыт. Ордук эдэр ыччат, оскуола оҕолоро сөбүлээн сылдьаллар диэн дириэктэр этэр.

Дмитрий Соловьев, "Арассыыйа - мин историям" историческай паарка дириэктэрэ: «Очень разносторонняя деятельность с применением новых информационных технологий. Мы его успешно реализуем. Посещаемость показывает востребованность музея для общества».

Үһүс номинацияны култуура эйгэтин, түмэллэр бырайыактарын өйөөн, олоххо киллэрэр тэрилтэ аата ааттанар. Быйыл бу премияны Өрөспүүбүлүкэ биир бөдөҥ тэрилтэтэ ылла.

Светлана Платонова, "Алмазэргиэнбанк" бэрэссэдээтэлин солбуйааччы: «Үс мусуойга үбүлээн көмөлөһөбүт. Биһи көмөбүтүнэн наһаа үчүгэй бырайыактар тэриллибиттэрэ. Холобур, Эрмитажтан, Третьяковскай галереяттан аан дойдуга биллэр худуоһунньуктар хартыыналарын аҕалан Өрөспүүбүлүкэбит нэһилиэнньэтигэр көрдөрдүбүт».

Өрөспүүбүлүкэ үрдүнэн күн бүгүн 93 түмэл баара биллэр. Сылын аайы түмэл ахсаана, көрөөччүлэрэ да элбии тураллар. Былырын Саха сирин түмэллэригэр уопсайа 700-тэн тахса киһи сылдьыбыта биллэр.