Сотору кэминэн Мэҥэ Хаҥаласка диализ киинэ арыллыа

Горнай улууһун Бэрдьигэстээҕиттэн сылдьар Кирилл Мартынов былырыын хаҥас бүөрэ ыалдьан, онтон ыарыыта бэргээн обследование барарга күһэллибитэ. Ол онно тута балыыһаҕа киирэн, диализ өҥөтүнэн туһаммыта биир сыл буолла. Дойдутуттан манна Дьокуускайга кэлэн дьиэ куортамнаан олоругар тиийэр. Нэдиэлэҕэ 3-4 чаас маннык сытан тустаах оборудование нөҥүө хаанын ыраастатар.

Кирилл Мартынов, Горнай улууһун олохтооҕо: "Бүөр ыарыыта биллэрбэт ыарыы. Кэмигэр көрдөрбүт эбиппин диэн үөрэ саныы сытабын. Медиктар олус үчүчгэйдик көрөллөр-истэллэр". 

Манна 15 аппарат турар. Уопсайа 60 киһи сылдьар. Хас биирдии ыарыһах тустаах болҕомтону ылар. Бу диализ киинэ былырыын сайын аанын тэлэччи аспыта.

Семён Старостин, диализ киинигэр медбрат: "Холбуубут, араарабыт уонна хааннарын баттааһынын көрөбүт. Ууларын кэтиибит, төһөнү ыларбытын холбуубут".  

Саха сиригэр нэһилиэнньэ ортотугар бүөр ыарыыта биир үрдүк көрдөрүүлээҕинэн, бүгүҥҥү күҥҥэ бэрт сытыытык турар кыһалҕа. Чуолаан гемодиализка наадыйар ыарыһах ахсаана алта сүүсчэкэ кэриҥэ, оттон диализ миэстэтэ олох аҕыйах. Ол курдук, өрөспүүбүлүкэҕэ диализ кииннэрэ Дьокуускайы таһынан, Жатайга, Мирнэйгэ, Ньурбаҕа, Нерюнгрига эрэ бааллар. Онон эбии бу киин аһыллыбыта тустаах ыарыһахтарга улахан көмө буолар.

Ксения Давыдова, амбулаторнай диализ салаатын сэбиэдиссэйэ: "Сүрүннээн эмтэнээччилэр орто саастаах дьон. Ол аата 65 диэри саастаахтар. Бу дьон бүөрдэрэ дтабеттан, хаан баттааһына үрдүгүттэн, уойууттан бүөрдэрэ аккаастыыр".  

Кииҥҥэ диализ үрдүк ирдэбилгэ ыытылларыгар бары усулуобуйа баар. Ол курдук манна  барыта стерильнай, туттуллар уулара кытта хас даҕаны түһүмэхтээх ыраастаныыны ааһар.

Ким Лукин, диализ киинин инженерэ: "Үс түһүмэхтээх ыраастааһыны ааһар, ол кэннэ бүтэһик уһугар тиийэн өссө төгүл ыраастанар. Онон саамай ыраас, үрдүк хаачыстыбалаах, туох да булкааһа суох ууну ылабыт".  

Сотору кэминэн, чуолаан атырдьах ыйыгар, Мэҥэ-Хаҥалас улууһугар бу Диализ киинин филиалын арыйыахтара. Билигин өрөмүөн, бэлэмнэнии үлэлэрэ барар тураллар. Оччотугар илин эҥээр ыарыһахтара, киин куоракка кэлбэккэ дойдуларыгар диализтанар кыахтаныахтара. Бүөр ыарыыта биллибэтинэн сиир, онон исписэлиистэр сылга биирдэ хайаан даҕаны бүөрү көрдөрөргө сүбэлииллэр.