"Култуура" национальнай бырайыак чэрчитинэн саҥардыы, өрөмүөн үлэтэ ыытыллар

Саха сирин норуоттарын муусукатын уонна фольклорун түмэлигэр быйыл "Култуура" национальнай бырайыак чэрчитинэн саҥардыы, тупсаран биэрии үлэтэ ыытылынна.  Түмэлгэ саҥа монитор, оборудованиелар, экспонаттары харайар анал ыскааптар уонна да атын наадалаах тэриллэр атыылаһыллан турдулар. Барыта 1,148 мөл.  сууммаҕа үлэ барда.

Мария Корнилова, СӨ муусука уонна фольклор түмэлин дириэктэрэ: "Олохтоох омуктарбытын сырдатар, кинилэр малларын-салларын, таҥастарын-саптарын көрдөрөр витрина арылынна. Национальнай бырайыагынан манна анаан манекен бөҕө ыллыбыт. Ол иһин фондаҕа харалла сыппыт таҥастарбыт миэстэлэрин буллулар".

Саха сирин норуоттарын муусукатын уонна фольклорун түмэлин үлэтэ киэн далааһыннаах, улахан суолталаах. Түмэлгэ историяны кэпсиир экспонаттар баалларын таһынан, киинэлэри, оҕолорго ойуулуктары, олохтоох омуктар ырыаларын-тойуктарын сөргүтэн, үйэтитэн кинигэлэри таһаараллар. Маны таһынан түмэл аан дойдунан сылдьан Саха сирин норуоттарын култууратын, үгэһин, олоҕун кэпсиир.

Мария Корнилова,СӨ муусука уонна фольклор түмэлин дириэктэрэ: "Көһө сылдьар түмэл” бырайыагынан Крым биэс куоратын кэрийэн кэллибит. Уонна Донецкай өрөспүүбүлүкэ икки куоратыгар сырыттыбыт. Бэйэбит олохтоох омуктарбыт музыкальнай үнүстүрүмүөннэрин көрдөрөн, сырдатан кэллибит".

Быйылгыттан "Дьиэ кэргэн" саҥа национальнай бырайыак үлэтин саҕалаата. Бырайыак чэрчитинэн өрөспүүбүлүкэ 22 култуура эбийиэгэ саҥардыллыа, аныгы техническэй оборудованиенан хааччыллыа.

Афанасий Ноев, СӨ култуура уонна духуобунай сайдыы миниистирэ: "Дьиэ кэргэн сыаннастара уонна култуура эйгэтин инфраструктарата диэн хайысханан быйыл өрөспүүбүлүкэҕэ 175 мөл. солкуобай көрүллэн турар. Бу федеральнай уонна өрөспүүбүлүкэ муницальнай бюджета".

Быйыл түмэл былаана киэҥ. Култуура эйгэтигэр сүҥкэн кылааты киллэрсибит Февронья Баишева 100 сыла, Александр Самсонов 90 уонна Аиза Решетникова 80 үбүлүөйдээх сыллара. Ол чэрчитинэн элбэх тэрээһиннэр ыытыллыахтара. Итиэннэ бэс ыйыгар "Көһө сылдьар түмэл" бырайыак үлэтин салгыаҕа. Оттон саҥардыллыбыт оборудованиелар төһүү күүс буолуохтара.