Салгын олбохтоох суудуналар сыаналарын таһаарыахтара

"Хивус" уулаах муус үрдүнэн нэһиилэ устан биэрэги булар. Өрүскэ балаһыаннньа уустугуран эрэрэ биллэр. Ол эрээри күннэтэ айан-сырыы быыстала суох тэриллэр. Уунан, мууһунан айанныыр уонан тиэхиньикэ айаннааччылары көһүтэн турар. Айаннааччы даҕаны аҕыйаҕа суох, биирдиилээн субуллан кэлэ тураллар. Сүрүннээн манна тимир суол пассажирдарын тиэйии-таһыы көхтөөхтүк барар.

Өрүскэ муус ууллан, уу күннэтэ элбии турар, таһым үрдүү илик эрээри, арыылартан уу сүүрүүтүн киириитэ түргэн. Ол иһин намыһах сир уунан тута туолан иһэр. Салгын олбохтоох суудуналар ыытааччылара этэлэринэн, балаһыаннньа өрүскэ күн ахсын уустугуран иһэр, тиэхиньикэ алдьаныыта да элбээбит.

Александр Костромин, суудуна ыытааччыта: "Билигин айанныырга уустук буолла. Онон сөптөөх сири талан айанныырга күһэллэбит. Чэпчэкитэ суох айан". 

Дьон-сэргэ көхтөөхтүк айанныыр, ким дьиэ кэргэнинэн манна кэлэр, ким үлэлии антах барар, ону-тэҥэ эр дьон ортотугар кусчуттар элбэхтэрэ көстөр.  

Суудуналар сарсыарда 7 чаастан киэһэ 8 чааска диэри сылдьаллар.

Бу Дьокуускай - Аллараа Бэстээх хайысханы тэҥэ, Кангалаас - Суотту, Мэҥэ Алдан - Кэскил хайысхаларынан дьону эмиэ салгын сыттыктаах суудуналар таһаллар. Билигин айан төлөбүрэ 3 тыһыынчаҕа тэҥнэһэр турар, ол эрээри бу муҥутуур сыана буолбатах.

Татьяна Николаева, корреспондент: "Салгын олбохтоох суудуналарга айан сырыыта 2,5 тыһыынча солкуобай эбит буоллаҕына, билигин 3 тыһыынчаҕа тэҥнэһэр. Оттон бу күннэргэ муус бардаҕына, балаһыанньа уустугурдаҕына 5 тыһыынчаҕа диэри үрдүүрэ күүтүллэр". 

Салгын олбохтоох суудунулар быһа холуйан паром сырыыта саҕаланыар, ол эбэтэр бу ыам ыйын бүтүтүгэр диэри айанныахтара. Өрүскэ муус бардаҕына, бу күннэргэ дьону суудунуттан суудунаҕа, ол эбэтэр аэроботка көһөрөн таһар буолуохтара. Билигин күн ахсын уопсайа 30 кэриҥэ аал айанныыыр. Салгыы айан-сырыы муус хайдах устарыттан быһаччы тутулуктаныаҕа.