Саха сирин алмаастарыгар Россия Дьоруойдарын ааттара иҥэрдилэр

Арассыыйа Дьоруойугар Андрей Григорьевка кини аатын сүгэр алмаас тааһы үөрүүлээх быһыыга-майгыга туттардылар. Андрей Григорьев Саха сириттэн төрүттээх 10-с дьоруой буолар. Бу бэлиэ түгэн байыас төрөөбүт күнүгэр сөп түбэстэ, онон икки бүк үөрүүлээх уонна долгутулаах диэн этэр.

Андрей Григорьев, Россия Дьоруойа: «Олус долгутуулаах. Алмаас эрэ ылыам дии санаабатаҕым, өссө төрөөбүт күммэр.Сахабыт сирин саамай күндү тааһын ылар диэни киһни тылынан да кыайан эппэт. Бу барыта анараа сылдьар уолаттарга күүстэригэр күүс эбэр. Барыта түргэнник түмүктэнэн, эйэлээх халлаан буоларыгар, уолаттар бары этэҥҥэ эргиллэн кэлэллэригэр ис сүрэхпиттэн баҕарабын».

Барыта 11 Россия Дьоруойдарын аата Саха сирин күндү тааһыгар иҥэриллэн, туттарыллынна. Хас биирдии Дьоруойга бу долгутулаах уонна эппиэтнэстээх түгэн буолар.

Игорь Юргин, Россия Дьоруойа: «Миэхэ бу улахан чиэс буолар. Билигин да итэҕэйбэккэ турабын. Бу киэн туттуу, чиэс. Киһи тылынан кыайан тириэрдибэт даҕаны бэлиэ түгэн».

Хас биирдии алмаас 10-тан тахса караттаах, анал быһыылаах, кырыылаах, ураты, дириҥ историялаах. Бу биир дойдулаахтарбыт хорсун быһыыларын үйэтитии, ытыктабыл бэлиэтэ буолар.

Иван Алексеев, СӨ үп миниистирин эбээһинэһин толорооччу: «Алмаас таас саамай кытаанах минерал буолар. Саха сирин уолаттара бары алмаас курдук кытаанах санаалаах, күүстээх дьон диэн этиэхпитин баҕарабыт».

Бу анал күндү таастар Өрөспүүбүлүкэ судаарыстыбаннай пуондатыгар хараллан туруохтара. Манна билигин Улуу Кыайыы 80 сылыгар анаммыт быыстапка үс хайысханан арахсан үлэлии турар. Онон олохтоохтору, ыалдьыттары кэлэн көрөргүтүгэр ыҥыраллар.