Киин куоракка хат дьахталлар уонна эмтэрэр ийэлэр босхо үүтүнэн хааччыллаллар

Дьокуускай олохтооҕо иккис оҕотун күүтэ сылдьар эдэр ийэ Кристина Сидорова бырааһыгар көрдөрүнэ кэлбит. Кристина бу ыам ыйыгар оҕолонуохтаах. Бырааһын анааһынынан босхо үүтү ааспыт ыйга ыла сылдьыбыт. 

Кристина Сидорова, Дьокуускай олохтооҕо: "Босхо үүт биэрэллэрин истибитим. Бырааһым Светлана Ивановна анаабытынан баран ылбытым. Олус үчүгэй амтаннаах. Туһалаах битэмииннэрдээх үүт". 

Хат дьахталларга уонна эмтэрэр ийэлэргэ анаан кулун тутар ый бүтүүтүттэн босхо үүт бэриллэр. Маныаха үүт дьахтар сааһыттан, социальнай балаһыанньатыттан тутулуга суох барыларыгар бэриллэр. Кылаабынайа хат дьахтар гинкелог быраастан, онтон эмтэрэр ийэ педиатр быраастан рецепт-направлениялаах буолара ирдэнэр.

Татьяна Борисова, СӨ 3№-дээх клиническэй балыыһатын гинеколог-акушер бырааһа: "Хат дьахталлар үксүлэрэ анемиялаахтар, аны барыбытыгар кэриэтэ белок тиийбэт. Маҕаһыынтан ылар аспыт сөбө суох. Ордук оҕо күүтэр дьахталларга. “Ийэ доруобуйата” диэн бырайыагынан киирбитэ. Бу муус устартан биэрэбит. Ый аайы үстүү лиитэрэ". 

Бохсо үүтү Дьокуускайдааҕы үүт собуотун туһааннаах пуунугар биэрэллэр. Дзержинскай уулууссатын 42/2 нүөмэригэр тиийэн өрөбүл күннэртэн ураты күн ахсын сарсыарда 9 чаастан күнүс 4 чааска диэри түҥэтэллэр. Пууҥҥа күҥҥэ ортотунан 35-50 ийэ кэлэн үүт ылар.

Татьяна Васильева, Дьокуускайдааҕы үүт собуотун маркетолога: "Үүт араас иҥэмтиэлээх битэмииннээх. Ол курдук А, Д3, В12, фолиевай кислота уонна да атын туһалаах састааптаах. Ийэлэр быраастан бигэргэтиллибит докумуоннаах буолуохтаахтар". 

Бу маннык дьоҕус хоско собуот үлэһиттэрэ кэлбит ийэлэргэ үүтү түҥэтэллэр. Биир ийэҕэ ыйга 3 лиитэрэ үүт бэриллэр. Бүгүҥҥү күҥҥэ кулун тутар бүтүүтүттэн номнуо 4 кэриҥэ тыһыынча лиитэрэ үүтү тарҕаппыттар. Пууҥҥа дьиэ кэргэн аҕалара, биитэр иккиэн кэлэн ылаллар. Үксүн кэрэ аҥаардар быраастарыттан, биитэр социальнай ситимтэн истэн,билэн кэлэллэр.

Хат дьахталлары уонна эмтэрэр ийэлэри сөптөөх аһылыгынан хааччыйыы бэрээдэгин туһунан өрөспүүбүлүкэ дьаһалын чэритинэн, үүт собуота доруобуйа харыстабылын министиэристибэтин кытта дуогабар түһэрсэн босхо үүтүнэн хааччыйар кыах баар буолла. Салгыы бу бырайыак инникитин улуустарга  кытта тарҕанара күүтүллэр.