Быйыл Дьокуускайга уопсайа 16 килэмиэтир усталаах суол өрөмүөннэниэҕэ

Дьокуускай биир киин уулуссата төрдүттэн өрөмүөнэ салҕанар. Улахан үлэ ыытыллар кэрчигэр суол сабыылаах турар. Онон үлэ симиэнэнэн арахсан тохтообокко барар. 

"Уулусса сабыылаах кэмигэр үлэ тэтимнээхтик барар. Үс биригээдэ тэҥинэн үлэлиир. Холобур, ол онно ардах уута сүүрэрэ холуодьаһын оҥороллор. Оттон бу манна уу турбатын көмүскүүр хапталҕаны куталлар. Үһүс биригээдэ гаас ситимин тардар", - Мария Дмитриева, корреспондент.  

Бу туһаайыынан оруобуна "Өрөгөй" спорт комплексын уунан хааччыйар турба ааһар. Ону кээһэммэтин диэн анал хаххалыыр бүрүөһүн оҥорбуттар итиэннэ сир хотойботун гына сылааһы тутар матырыйаалы тэлгэппиттэр.

Итини сэргэ төрдүттэн өрөмүөн кэмигэр гаас ситимэ уларыйар.Сорох сиринэн үрдүк күүрүүлээх модьу турбалары угуохтара, сороххо эргэрбитин саҥанан солбуйуохтара.  Ойуунускай аатынан уулусса өрөбүөнэ икки сыл устата салҕаныаҕа.

Айгылаан Григорьев, бэдэрээтчит: "Ол курдук быйыл биһиги Петровскай уулуссаҕа диэри былаанныыбыт. Урукку аспаалы көтүрэбит. Бу суолбут хас да тииптээх. Сорох сиригэр оннуттан уларытабыт, сорох сирдэринэн эргэ аспаалын уларытабыт".

Өрөмүөн үлэтэ түмүктэннэҕинэ манна бэлисипиэттээх дьоҥҥо аналлаах туһунан суол, сатыы дьон хаамарыгар тротуар баар буолуоҕа. Оптуобус тохтобуллара саҥардыллыахтара, уулусса уоттара эмиэ тупсаҕай көрүҥнээххэ уларыйыа. Маныаха саамай сүрүн үлэ суол оннун оҥорууга улахан болҕомто ууруллар.

Ойуунускай аатынан уулусса Дьокуускай биир хорук суола. Онон өрөмүөн кэмигэр балаһаларынан арааран сабыахтара. Арай бу билиҥҥи курдук турба уларыйар сирдэригэр аҕыйахтыы күн сырыыны тохтотуохтара. Оттон  быйыл Дьокуускайга уопсайа 16 км суол өрөмүөннэниэҕэ.

Афанасий Александров, "Главстрой" тэрилтэ дириэктэрэ: "Национальнай бырайыагынан 13 эбийиэктээхпит. Билиҥҥи туругунан бары хантараактаахтар, бэдэрээтчиттэр биллэн тураллар. Хас да сыл оҥоһуллар суолларбытын оҥорон саҕалаатыбыт. Ол курдук Хабарова, Ойуунускай, Дачная уулуссаларга хапытаалынай өрөмүөнү саҕалаатыбыт".

Сүрүн үлэ маай бырааһынньыктарын кэнниттэн саҕаланыа. Быйыл саамай уустук эбийиэгинэн Советскай Армия 50 сыла уулусса оҥоһуута буолара күүтүллэр. Бу суол үйэтигэр аан бастакытын оҥоһуллар. Кальвицаттан Бабушкинаҕа диэри кэҥээн, 4 балаһалаах буолара былааннанар. Билигин чинчийии үлэтэ түмүктэнэн, бэдэрээччити талар күрэх ыытыллар.