Дьокуускай олохтоохторо "Кыайыы Вальса" акцияҕа кыттарга бэлэмнэнэллэр

Улуу Кыайыы 80 сылын көрсөр Кыайыы вальса быйыл элбэх киһини түмтэ.  Бу үрдүк суолталаах тэрээһиннэ дьон-сэргэ өссө ааспыт ыйтан бэлэмнэнэн саҕалаабыта.

Дьокуускайдааҕы национальнай гимназия бу аахсыйаҕа сылын аайы кыттар. Быйыл да туора турбата. Манна оскуола оҕолоро эрэ буолбакка, учууталлар, төрөппүттэр бары көхтөөх кыттыыны ылаллар.

Анатолий Чиряев, Дьокуускайдааҕы национальнай гимназия дириэктэрин иитэр үлэҕэ солбуйааччы: «70 тахса паара баар. Ийэлэр аҕалар кытталлар, оҕолор төрөппүттэрин кытта, эбээлэрин, эһээлэрин кытта. Маннык үтүө аахсыйаҕа кыттарбыт биһиэхэ суолталталаах».

Кыайыы вальса кыайыыны уһансыбыт хорсун саллааттар албан ааттарыгар сүгүрүйэн, өрөгөйдөөх күҥҥэ ананар. Тэрээһин үгэс быһыытынан сылын аайы ыытыллар, бу иннинэ 70-80 үнкүлүүр паара кыттар буоллаҕына. Быйыл үбүлүөйдээх сылынан бары түмсэн, бэлэмнэнэн уопсайа 5 тыһыынча паара үҥкүүлээри сылдьар.

Сардаана Брызгалова, Дьокуускай куорат култуураҕа уонна духуобунай сайдыыга салалтатын салайааччыта: «Доҕордоһуу болуоссатыттан Орджоникидзе болуоссатыгар диэри барыларын схемалаан туруораммыт үҥкүүлэтиэхтээхпит. Олохтоохтоорго уонна ыалдьыттарга болуоссаттарга миэстэ бэлэмнээтибит. 5 тыһ. паара бэлэмнэнэ сылдьар буоллаҕына, буолар күнүгэр өссө элбэх киһи буолуо диэн сабаҕалыыбыт».

Кыайыы вальса ыам ыйын 8 күнүгэр 15 чаастан Дьокуускай куорат киин уулуссатыгар уонна болуоссаттарыгар киэн далааһыннаахтык ыытыллара былааннанар. Онон олохтоохтору, ыалдьыттары көхтөөх кыттыыны ыларгытыгар ыҥыраллар.