"Бэтэрээҥҥэ-ыалдьыттыы" бүтүн дойдутааҕы аахсыйаҕа тэрилтэлэр кытталлар

98 сааһыгар үктэммит Татьяна Митрофановна Филиппова сыллата Кыайыы күнүн көрсө элбэх ыалдьыттарданар. Быйыл "В гости к ветерану" аахсыйа чэрчитинэн, ытык кырдьаҕаска кэһии тутуурдаах, эҕэрдэ аргыстаах Өксөкүлээх аатынан норуоттар доҕордоһууларын дьиэтиттэн кэллилэр. Тыыл бэтэрээнигэр астаах-үөлээх корзина уонна Кыайыы 80 сыла бэлиэни туттардылар.

Антонида Корякина, Өксөкүлээх аатынан норуоттар доҕордоһууларын дьиэтин дириэктэрэ: «Сыалбыт-сорукпут – кырдьаҕастары кытта кэпсэтэн, бэйэбит үлэбитин кэпсээтибит».

Татьяна Митрофановна Хаҥалас улууһун Тиит-Арыы дьаамсыктарын сыдьаана. Аҕата сэриигэ баран кини кыратыттан ийэтигэр көмөлөһөн ыанньксытынан, учуоччутунан үлэлээбитэ.

Татьяна Филиппова, тыыл бэтэрээнэ: «13 саастаах оҕо ыанньыксыттааммын, ийэбэр көмөлөһөн. Оннук сылдьан ийэбит от тиэйэр икки оҕуһунан. Бырааттарбыт ким суол оҥорооччу, ким убаһа көрөөччү».

Татьяна Митрофановна бастакы кэргэниттэн 4 оҕолоох огдообо хаалан, иккиһин сэрии кыттыылааҕар Дмитрий Львович Филипповка кэргэн тахсан Сиинэҕэ баран олохсуйар. Онно эбии 2 оҕолонор. Уопсайа 6 оҕо ийэтэ, билигин Татьяна Митрофановна 15 сиэннээх, 30-тан тахса хос сиэннээх. Төһө да сааһа ырааттар ытык кырдьаҕас  дьаһаллаах хаһаайка, куукунатыгар түбүгүрэр- булочка астыыр, ситии хатар эбит.

Ирина Стрекаловская, "Потомки государевых ямщиков" тэрилтэ бэрэссэдээтэлэ: «Татьяна Митрофановна олус кыахтаах, историяны барытын өйдүүр, үйэлээх сааһыгар ким туох буолбутун, ханна олорбутун. Биһи кэккэбитигэр өссө өр сылдьыан баҕарабыт».

Сэрии, сут сылларын этинэн-хаанынан билбит Татьяна Митрофановна үлэттэн толлуман, үлэ киһини киһи гынар диэн бигэ санаалаах.

Татьяна Филиппова, тыыл бэтэрээнэ: «Үлэттэн киһи туох да буолбат, киһини сайыннарар. Дьоллоохтук олорун, бары үчүгэй буолун уонна доҕордоһуу наада».

Татьяна Митрофановна "Ямские бубенцы" ансаамбыл кыттыылааҕа билигин даҕаны тэрээһиннэргэ ылыы, туойа сылдьар.