Анал байыаннай дьайыыга көмө салҕанар

Волонтердар ыстааптарыгар үлэ-күөстүү оргуйар. Билигин волонтердар Улуу Кыайыы 80 сылыгар бэлэмнэнэллэр. Иистэнньэҥнэр  100 миэтэрэлээх георгиевскай лиэнтэни тигэ сылдьаллар.

Дария Павлова волонтердар сүрүн ыстааптарыгар кэлэн көмөлөспүтэ ыраатта. Билигин бары түмсэн Кыайыы 80 сылын көрсөргө бэлэмнэнэллэрин кэпсиир.

Дария Павлова, волонтёр: "Дьокуускай ыччата” түмсүү сакаас биэрбитэ. Ону тигэ сылдьабыт. Ону олус наадалаах дьыала диэн ылыстыбыт. Олус эппиэтинэстээх".

Өрөспүүбүлүкэ тэрилтэлэрэ, салалтата биирдиилээн да дьон анал байыаннай дьайыы кыттыылахтарыгар  өйөбүл буолаллар. Хас нэдиэлэ ахсын таҥас-сап, эмп, бородуукта тиһигин быспакка ыытыллар. Оттон үөрэх кыһалара, устудьуоннар анаммыт бириэмэнэн кэлэн үлэлииллэр, күүс-көмө буолаллар.

Айсен Кубаров, "Айар Уустар" креативнай индустрия колледжын устудьуона: “Үөрэхпитинэн “Байанайдарга” сиэккэ өрө кэлэ сылдьабыт. Маннык наар көмөлөһөбүт".

Улуу Кыайыы 80 сылын көрсөр өрөгөйдөөх күммүт чугаһаата. Волонтердар бу күннэргэ байыастарга дойдуларыттан көмө, бэлэх ыыппыттара. Баһыылка ыам ыйын 9 күнүгэр диэри тиийэн, уолаттарбытын үөрдүө диэн эрэнэллэр. Билигин да үлэ тохтообот, олохтоохтор, тэрилтэлэр гуманитарнай көмөнү аҕала тураллар. 

Анна Ефимова, "Якутия с тобой"  хамсааһын бэрэссэдээтэлэ: "Өрөспүүбүлүкэ олохтоохторуттан көрдөһүөм этэ, оҕолорбутун өйүөххэйиҥ. Биһиги аахсыйабытыгар кыттыһыҥ диэн ыҥырабын. Таҥнар таҥас да буоллун, суунар тэрил да буоллун биһиги ыстааппытыгар аҕалыаххытын сөп. Аадырыспыт Бестужев-Марлинскай уулуссатын 5 №-дээх дьиэтэ".

Бу курдук бары түмсэн, ким да туора турбакка анал байыаннай дьайыы кыттыылаахтарыгар бэйэлэрин көмөлөрүн ууран, сэмэй кылааттарын киллэрэллэр. Байыастарбыт туох да улахан кыһалҕаны көрсүбэккэ дойдуларын чиэстээхтик көмүскүөхтэрэ диэн бигэ эрэнэллэр.