Ил Дархан Айсен Николаев үөрэх кыһаларыгар саҥа оптуобус күлүүһүн туттарда

Үөрэх кыһалара саҥа оптуобустаннылар. Мантан ыла түргэн, сылаас олбохтоох, элбэх миэстэлээх, куттала суох уонна сымнаҕастык айанныырга кыах баар буолла.

Аан бастакынан саҥа массыыналары суоппардар сыаналаатылар. Максим Илларионов уопуттаах суоппар. Сунтаар улууһун Элгээйи орто оскуолатыгар үлэлээбитэ 10-тан тахса сыл буолла. Номнуо саҥа оптуобуһу кэлэн, көрөн үрдүк сыанабылы биэрдэ.

Максим Илларионов, суоппар: "Бу массыынабыт кэлин привод. Ол паромҥа киирэргэ-тахсарга эрэйдээх соҕус буолуо да, уолаттар сылдьыахпыт. Уоннааҕыта барыта үчүгэй, 2025 сыллааҕы массыына".

Бу күн барыта 27 үөрэх кыһата саҥа оптуобус күлүүһүн тутта. Саҥа массыына киэҥ-куоҥ 16 миэстэлээх, толору хааччыллыылаах. Саха сирин тыйыс тымныытын тулуйар, толору эппиэттиир гына оҥоһуллубут. 

Иван Павлов, Хаҥалас улууһун Тиит-Арыы нэһилиэгин оскуолатын дириэктэрэ: "Бэйбит массыынабыт номнуо эргэрэн уһуллубута. Быйыл массыына биэрэллэр диэни истэн үөрдүбүт. Киэҥ-куоҥ, хаама сылдьыахха сөп".

Владимир Ноговицын, В.В. Филиппов аатынан Бэрдьигэстээхтээҕи гимназия дириэктэрэ: "Эрдэ оптуобустаах этибит. Оттон бу дьоҕус массыына кыраны сииринэн барыстаах буолуо. Кыра да күрэхтэри көтүппэккэ сылдьыахпыт".

Мантан ыла оҕолор өрөспүүбүлүкэҕэ ыытыллар араас күрэхтэргэ, олимпиадаларга көтүппэккэ кыттар буолуохтара диэн үөрэх эйгэтин үлэһиттэрэ үөрэ кэпсииллэр.

Анисия Игнатьева, Сунтаар улууһун анал коррекционнай оскуолатын дириэктэрэ: "сунтаарга диэри 1000 килэмиэтир. Онон манна кэлэрбит-барабыт ыарахан. Онон бүгүн массыына тутаммыт үөрэн, долгуйан турабыт. Оскуолабытыгар 61 оҕолоохпут".

Саха сиригэр бу биэс сыл иһигэр 212 үөрэх кыһата саҥа оптуобустанна. Оттон быйылгы сылга 40 саҥа массыына ылыллара былааннанар.