Олохтоох хирургтар эндоскопия салаатыгар саҥа оборуудабанньаны баһылыыллар

Уустук эпэрээссийэҕэ бэлэмнэнии. Бу сырыыга саала иһигэр хаһааҥҥытааҕар да элбэх киһи мустубут. Саҥа аппараат туһаныллар, ол иһин. Ыарыһах номнуо норкуоска сытар. Онон эпэрээссийэ тэтимнээхтик саҕаланар. Үөс тымырыгар кыбыллыбыт тааһы хостуохтара. Маннык ньыма эндоскопическай дэнэр.

"Эндоскопическай эпэрээссийэ диэн киһи иһин хайа быспакка эрэр айаҕынан киирэн үөс тааһын хостооһун. Ыарыы төһө уустугуттан көрөн маннык эпэрээссийэ ортотунан биир чаас салҕанар", - Мария Дмитриева.

Маныаха анаан Москватааҕы клиническэй научнай киин хирура Иван Недолужко маастар-кылаас көрдөрө кэлбит. Кини 3 күн устата саамай уустук ыарыһахтарга көмөлөһөр. Билигин эпэрээссийэ остуолугар сытар киһи үөһүн тымырыгар баар тааһа олус улахан диэн сыаналаатылар. Онон лазер аппараатынан үлтүрүтэргэ быһаардылар.

Михаил Круглов, "Кардио медикс" хампаанньа инженерэ: "Тымыра бэйэтэ олус кыараҕас, ыарыһах бэйэтэ олус дьоҕус, оттон тааһа улахан. Онон көннөрү эндоскопия ньыматынан таһаарар табыллыбат. Ол иһин лазерынан үлтүрүтэбит". 

Хирург хас биирдии хамсаныытын экраҥҥа көстөрүнэн салайтарар. Маастар кылаас буолан барытын кэпсии-кэпсии оҥорор. Саҥа ньыманы уонна аппараат кыаҕын эпэрээссийэлиир саала иһиттэн олохтоох хирургтар көрөллөр.

Андрей Филиппов, СӨ 2-с №-дээх балыыһатын суһал көмө киинин эндоскопист бырааһа: "Олус үчүчгэйдик көрдөрөр. Итинник эпэрээссийэлэри биһиги оҥоро сылдьтабыт. Кини маастар-кылаас көрдөрөүгэр эбии ньымалары, ону таһынан уустук балаһыанньаҕа тугу гынары көрдөрөр".

Маннык эндоскопия ньыматынан эпэрээссийэни биһиги хирургтарбыт толору оҥороллор. Маастар-кылааска аҕалыллыбыт саҥа аппарааттар үөс тааһын эрэ ылыыга буолбакка туһаныллар кыаҕа киэҥ. Холобур, биир саамай наадалаах салаата искэҥи эмтээһиҥҥэ. Онон маннык оборуудабанньа олус наалдалааҕын ыйаллар. 

Зоя Яковлева, СӨ 2-с №-дээх балыыһатын эндоскопия салаатын сэбиэдиссэйэ: "Бу  эндоскопическай ретрограднай холангио-панкреатография диэн ньыма эндоскопистар саамай чыпчаал көрүҥнэрэ буолар, олох сатыыр эрэ дьон оҥорор ".

Уустук эпэрээссийэ хаамыытын аактабай саалаттан быраастар быһа холбонууга көрөллөр. Уопсайа 3 күн иһигэр 10 тахса үөһүгэр ыарахан диагнозтаах киһи тааһын ылларда.