Суол өрөмүөнүн үлэтэ саҕаланна

Өрөмүөн үлэтэ Ойуунускай уулуссатыгар саҕаланна. Билигин үлэһиттэр Сайсары күөл муостатыттан түһэр-тахсар суол эргэ асфальт бүрүйүүтүн көтүрэ сылдьалллар. Тустаах суол учаастагар өрөмүөн үлэтин  "Дороги саха" тэрилтэ ыытар.  Суол үлэһиттэрэ сырыыны хааччахтаабат туһуттан түһүмэҕинэн суол балаһаларын сабыахтара.

Айгылаан Григорьев, бэдэрээтчит: "Сайсары муостатыттан са5алаан Дежнев быһа охсуһуутугар диэри икки балаһаны сабабыт. Сырыы икки балаһанан баар буолуо. Биир өттүн бүтэрдэхпитинэ бииригэр көһүөхпүт. Быйыл Петровского уулуссаҕа диэри өрөмүөнү былаанныыбыт. Суолу барытын толору саппаппыт, арай коммуникация ааһар сирдэригэр аҕыйах күҥҥэ сырыны тохтотуохпут".

Быйылгы сылга Дьокуускайга суол-иис оҥоһуутугар 2 миллиард кэриҥэ үп көрүлүннэ. Уопсайа 15,5 километр суол саҥаттан оҥоһуллуоҕа. Уулуссалары тэҥэ, суол силбэһиилэрин эмиэ оҥоруохтара, онно тротуар, автобус тохтобуллара эмиэ киирэллэр. 

Афанасий Александров, "Главстрой" тэрилтэ дириэктэрэ: "Билиҥҥи туругунан туох баар бары эбийиэктэрбит хантараактаахтар. Билигин сүрүн эбийиэктэрбитигэр үлэни саҕалаатыбыт. Бу балар 27 сылга диэри салҕанар өрөмүөннэр. Билигин 5 сиргэ үлэ саҕаланна, атыттарга бэлэмнэнии барар".

Уопсайа 13 эбийиэккэ үлэ ыытыллыаҕа. Бу иһигэр өтөрүнэн өрөмүөн үлэтэ ыытыллыбатах учаастактара эмиэ киирдилэр.

Үгүс суоппар эрэйи көрөр суола Сэбиэскэй Аармыйа 50 сыла уулуссата. Киин куораппыт биир ордук кыһалҕалаах суола. 

"Бу тустаах суол учаастагар аан маҥнайгытын төрдүттэн өрөмүөн ыытыллыаҕа. Ол курдук ыам ыйыгар бэдэрээччити быһаарар куонкурус буолуоҕа. Оттон бэс ыйыттан үлэ саҕаланыаҕа. Оттон билигин гаас ситимин турбаларын саҥардыы барар", - Ирена Осипова, корреспондент.

Өрөмүөн үлэтэ хаһан да ыытыллыбатах суолугар аны 50 тахса сыл турбут гаас турубалара уларыйыахтара. Манна билигин туһааннаах тиэхиньикэ көмөтүнэн газовиктар суолу икки өттүттэн хаһа сылдьаллар.

Борис Корнилов,"Сахатранснефтегаз" гаас ситимин саҥардар салаатын сүрүннүүр инженерэ: "Гаас турбатын 300-тэн 500-х эргимтэлээххэ уларытабыт уонна саҥардан биэрэбит. Бу курдук суолу оҥорооччулар тахсыахтарын иннинэ гаас, уот, ситимэ уларыйар".

Өрөмүөн үлэтэ куоракка эрэ буолбакка, куорат таһынааҕы бөһүөлэктэри, нэһилиэктэри эмиэ хабыаҕа. Ону тэҥэ Покровскайдыыр суолга турар Тускул дьоҕус оройуонугар суолу оҥоруохтара. Өрөмүөн үлэтэ хаачыстыбалаахтык ыытылларыгар улахан болҕомтону ууруохтара.