Сотору кэминэн Саха сиригэр суудуналары оҥорон таһаарар кыахтаныахпыт

Петр Макаров газосварщик идэлээх. Жатайдааҕы суудуналары оҥорон таһаарар комплекс тутуутугар үлэлэһэ сылдьар. Манна билигин тус туһунан сыах үлэлииригэр бэлэмнэнии түбүгэ барар турар.

Петр Макаров, газосварщик: "Бу биһиги ЧПУ станокка быһыллыбыт оҥоһуктары остуол үрдүгэр уурталыахтаахпыт".

Жатайдааҕы суудуналары оҥорон таһаарар собуот 2019 сыллаахтан тутулла турар. Эрдэ Саха сиригэр устар ааллары оҥорон таһаарыы суох эбит буоллаҕына, мантан инньэ баар буолуоҕа.

“Жатайдааҕы суудуналары оҥорор комплекс тутуута түмүктэнэр түһүмэҕэр кэллэ. Ол курдук бу ый бүтүүтэ туһааннаах оборуудабанньалары таҥыыны саҕалыахтара. Билигин оҥорон таһаарыыга бэлэмниир үлэлэр бара тураллар. Собуот үлэҕэ киирдэҕинэ инникитин сылга уонча суудунаны оҥорор соруктаах ”,- Татьяна Николаева, корреспондент.

Саҥа комплекс оҥорон таһаарыыга көҥүл ылан, номнуо 2 сакааска сөбүлэҥ түһэрсэн олорор.

Влад Пермяков, "Жатайская судоверфь" АО генеральнай дириэктэрэ: "Сунтаар улууһун кытта кыракый тыа хаһаайыстыбатын тиэхиньикэтин тиэйэр паром тутуутугар сөбүлэҥ түһэрсибиппит. Итини  сэргэ ЛОРП тэрилтэҕэ 100 м тахса усталаах баржа тутуутун быйыл саҕалыахпыт".

Комплекс тутуутун хаамыытын бырабыыталыстыба бэрэссэдээтэлин бастакы солбуйааччы Дмитрий Садовников көрдө.

Дмитрий Садовников, СӨ бырабыыталыстыбатын бэрэссэдээтэлин бастакы солбуйааччы: "Кэлэн көрдүбүт. Тэрилтэ салалтатын кытта тугунан көмөлөһүөхпүтүн сөбн, туох итэҕэстэр баалларын кэпсэттибит".

Аан бастакы ураты собуот үлэҕэ киирдэҕинэ 600-чэкэ үлэ миэстэтэ тахсыаҕа. Маныаха эдэр исписэлиистэри эрдэтэн бэлэмнээн бастакы үлэһиттэр бааллар.  Үлэһиттэргэ анаан манна олорор уонна уопсай дьиэлэр тутулла тураллар. 7 этээстээх , 96 хостоох, 4 тыһыынчаттан тахса квадратнай миэтэрэ иэнннээх уопсай дьиэ 200 киһи олороругар ананар. 

Виталий Лебедев, тутар тэрилтэ сүрүннүүр исписэлииһэ: "Билигин ис өттүн оҥоруу бара турар. Билигин 5-6 этээскэ муостатын номнуо оҥоро сылдьаллар. Бу сыл 3 кыбаарталыгар бүтэрэр былааннаахпыт".

Бүгүҥҥү күҥҥэ эбийиэккэ 20тэн тахса үлэһит ис-тас үлэтин, инженернэй ситимнэри таҥыыга үлэлии сылдьар. Маннык тэтиминэн аны күһүҥҥэ диэри үлэ үмүрүйэн, уопсай дьиэ бэлэм буолан Жатайдааҕы суудуналары оҥорон таһаарар комплекс үлэһиттэрэ олорор кыахтаныахтара.